പാരിസ്: സാമ്പത്തികമേഖലയെ മുന്നോട്ടുനയിക്കുന്നതിനായി ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ തൊഴില്‍ പരിഷ്‌കരണ നിയമത്തില്‍ ഒപ്പുവച്ചു. അഞ്ചിന നിര്‍ദേശങ്ങളടങ്ങുന്നതാണ് ബില്‍.
രാജ്യത്ത് നിലവിലുള്ള തൊഴിലില്ലായ്മ പരിഹരിക്കുന്നതിനു വേണ്ട നിര്‍ദേശങ്ങളാണു നിയമത്തിലുള്ളത്. തൊഴിലാളിയും തൊഴില്‍ദാതാവും തമ്മിലുള്ള ധാരണകള്‍ കൂടുതല്‍ സുതാര്യമാകുന്ന നടപടികള്‍ നിയമത്തിലുണ്ട്. കര്‍ശനമായ തൊഴില്‍ നിയമങ്ങള്‍ ഫ്രാന്‍സില്‍ തൊഴിലില്ലായ്മ വര്‍ധിപ്പിച്ചെന്നാണു വിവിധ രാജ്യങ്ങള്‍ അഭിപ്രായപ്പെട്ടത്. നിലവിലുള്ള നിയമങ്ങള്‍ തൊഴിലാളിയെ പിന്തുണയ്ക്കുന്ന തരത്തിലുള്ളതാണ്.
അതേസമയം മാക്രോണിന്റെ ബില്ലിനെതിരേ കടുത്ത വിമര്‍ശനവുമായി തൊഴിലാളി യൂനിയനുകളും പ്രതിപക്ഷ കക്ഷികളും രംഗത്തെത്തി. വിവിധയിടങ്ങളില്‍ ഇവര്‍ പ്രതിഷേധ പ്രകടനങ്ങള്‍ സംഘടിപ്പിച്ചു. തൊഴിലാളികള്‍ക്കു തൊഴിലിടങ്ങളില്‍ നല്‍കുന്ന സംരക്ഷണം ഇല്ലാതാക്കുന്നതാണു പുതിയ പരിഷ്‌കാരങ്ങളെന്നാണ് യൂനിയനുകളുടെ ആരോപണം. നിരവധി യുവാക്കള്‍ മാക്രോണിനെതിരേ രംഗത്തെത്തിയിട്ടുണ്ട്. 'ജനാധിപത്യത്തില്‍ വിശ്വസിക്കൂ, നിങ്ങള്‍ വിശ്വസിക്കുന്ന ജനാധിപത്യം തെരുവിലല്ല' എന്നാണ് മാക്രോണ്‍ ഇതിനോട് പ്രതികരിച്ചത്.