പയ്യന്നൂര്‍: കരിവെള്ളൂരില്‍ ജ്വല്ലറി കടകളിലും പലചരക്ക് കടയിലും കവര്‍ച്ച. ഇന്നലെ പുലര്‍ച്ചെയാണ് സംഭവം. തെക്കെ മണക്കാട്ടെ സി.കെ.വി ഗംഗാധരന്റെ ഉടമസ്ഥതയിലുള്ള സി.കെ വി ജ്വല്ലറി വര്‍ക്‌സിലും മരുമകന്‍ വി.വി ബാബുവിന്റെ ഉടമസ്ഥതയിലുള്ള ജ്വല്ലറി വര്‍ക്‌സിലും സമീപത്തെ ടി.പി ജുനൈദിന്റെ ജമാല്‍ സ്റ്റോറിലുമാണ് കവര്‍ച്ച നടന്നത്.
സി.കെ വി ജ്വല്ലറി വര്‍ക്‌സിന്റെ മുന്‍വശത്തെ ഷട്ടര്‍ ഉയര്‍ത്തിയാണ് കവര്‍ച്ച നടത്തിയത്. വെള്ളി ആഭരണങ്ങളും തകിടുകളും ഉറുക്കുകളും മോഷണം പോയി. വര്‍ഷങ്ങള്‍ക്ക്  മുന്‍പും ഈ സ്ഥാപനങ്ങളില്‍ കവര്‍ച്ച നടന്നിരുന്നു. അന്ന് സ്വര്‍ണാഭരണങ്ങള്‍ ഉള്‍പ്പെടെ ലക്ഷങ്ങളുടെ നഷ്ടം സംഭവിച്ചിരുന്നു. ജുനൈദിന്റെ പലചരക്ക് കടയില്‍ നിന്ന് ചില്ലറ നാണയങ്ങള്‍ മാത്രമെ നഷ്ടപ്പെട്ടിട്ടുള്ളു. തൊട്ടടുത്ത് പ്രവര്‍ത്തിക്കുന്ന കരിവെള്ളൂര്‍ സര്‍വിസ് സഹകരണ ബാങ്കിന്റെ സി.സി.ടി.വിയില്‍ കവര്‍ച്ചക്കാരുടെ ദൃശ്യങ്ങള്‍ പതിഞ്ഞതായി പയ്യന്നൂര്‍ പൊലിസ് കണ്ടെത്തി. പുലര്‍ച്ചെ രണ്ടു മണിയോടെ പതിഞ്ഞ ദൃശ്യത്തില്‍ മൂന്നുപേരാണുള്ളത്.