കോഴിക്കോട്: വിദ്യാര്‍ഥി നഗരത്തിലെ ലോഡ്ജ് മുറിയില്‍ ദുരൂഹസാഹചര്യത്തില്‍ മരിച്ച നിലയില്‍. വെള്ളയില്‍ ജോസഫ് റോഡിലെ അറഫ ഹൗസില്‍ ഷാജഹാന്റെ മകനും മലബാര്‍ ക്രിസ്ത്യന്‍ കോളജിലെ ബി.കോം രണ്ടാംവര്‍ഷ വിദ്യാര്‍ഥിയുമായ ഷാഹില്‍ (22) ആണ് മരിച്ചത്. സഹോദരങ്ങള്‍: ഷാനു, ആയിഷ
സംഭവവുമായി ബന്ധപ്പെട്ട് നടുവട്ടം കണ്ണന്‍തൊടി സ്വദേശി ആഷിഖ്, തന്‍വീര്‍ എന്നിവരെയും ഇവരുടെ സുഹൃത്തെന്നുപറയുന്ന യുവതിയെയും പൊലിസ് കസ്റ്റഡിയിലെടുത്തിട്ടുണ്ട്. സംഭവത്തില്‍ മയക്കുമരുന്ന് ഉപയോഗവുമായി ബന്ധപ്പെട്ട ചില സൂചനകളുള്ളതായി പൊലിസ് പറഞ്ഞു.
വാര്‍ത്ത റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകനെ ഒരുസംഘം ആളുകള്‍ ആക്രമിച്ചു പരുക്കേല്‍പ്പിച്ചു. മലയാള മനോരമ ലേഖകന്‍ ദിലീപ് ദേവസ്യക്കാണ് മര്‍ദനമേറ്റത്. ദിലീപിനെ നഗരത്തിലെ സ്വകാര്യ ആശുപത്രിയില്‍ പ്രവേശിപ്പിച്ചു.
കഴിഞ്ഞ ദിസവം രാത്രി 11.25 നാണ് മീഞ്ചന്ത മിനി ബൈപാസ് റോഡിലെ മിംസ് ആശുപത്രിക്കു മുന്നിലുള്ള ലോഡ്ജില്‍ ആഷിഖും തന്‍വീറും മുറിയെടുക്കാനെത്തിയത്. ആശുപത്രിയില്‍ ഒരാളുണ്ടെന്നും അവിടെനില്‍ക്കാന്‍ കഴിയാത്തതിനാലാണു മുറിയെടുക്കുന്നതെന്നും ഇവര്‍ ലോഡ്ജിലെ റിസപ്ഷനിസ്റ്റിനോട് പറഞ്ഞു.
ആശുപത്രിയിലെ പാസ് കാണിക്കണമെന്നാവശ്യപ്പെട്ടപ്പോള്‍ ആധാര്‍ കാണിക്കുകയും തുടര്‍ന്നു മുറി നല്‍കുകയും ചെയ്യുകയായിരുന്നുവെന്ന് ലോഡ്ജ് നടത്തിപ്പുകാര്‍ പറഞ്ഞു. ആഷിഖിന്റെ പേരിലാണ് മുറിയെടുത്തത്. ഫോണ്‍ നമ്പറും ലഡ്ജറില്‍ രേഖപ്പെടുത്തിരുന്നു. പിന്നീട് ഇവര്‍ വിളിച്ചതിനെ തുടര്‍ന്നാണ് ഷാഹില്‍ ഇവിടെയെത്തിയതെന്നാണു പൊലിസ് സംശയിക്കുന്നത്. ഇന്നലെ പുലര്‍ച്ചെ സുബ്ഹി നിസ്‌കാരത്തിന് പോകുകയാണെന്ന് പറഞ്ഞാണ് ഷാഹില്‍ വീട്ടില്‍നിന്ന് ഇറങ്ങിയത്. ലോഡ്ജില്‍ എത്തിയതിനുശേഷം ഷാഹിലിന് ദേഹാസ്വാസ്ഥ്യം അനുഭവപ്പെടുകയും മരിക്കുകയുമായിരുന്നുവെന്നാണ് കൂടെയുണ്ടായിരുന്നവര്‍ പറയുന്നത്. ഷാഹിലിന്റെ മൃതദേഹം പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ക്കു വിട്ടുകൊടുത്തു. സംഭവത്തില്‍ മെഡിക്കല്‍ കോളജ് സി.ഐ മൂസ വള്ളിക്കാടന്റെ നേതൃത്വത്തിലുള്ള സംഘം അന്വേഷണം ആരംഭിച്ചിട്ടുണ്ട്.
സംഭവസ്ഥലത്തുണ്ടായിരുന്ന യുവതിയെ ഒരു സംഘം തടഞ്ഞു വയ്ക്കുന്നത് ശ്രദ്ധയില്‍പ്പെട്ടതിനെ തുടര്‍ന്ന് ഇക്കാര്യം മറ്റുള്ളവരോട് ചോദിക്കുന്നതിനിടെയാണ് പത്തോളം പേരടങ്ങുന്ന സംഘം മാധ്യമപ്രവര്‍ത്തകനെ മര്‍ദിച്ചത്. മാധ്യമ പ്രവര്‍ത്തകന്‍ ആണെന്നു പറഞ്ഞപ്പോള്‍ നാഭിക്കു ചവിട്ടുകയും മൂക്കില്‍ ശക്തിയായി ഇടിക്കുകയും നിലത്തിട്ടു ചവിട്ടുകയുമായിരുന്നു.