മുക്കം: മദ്യ, ലഹരി മാഫിയകളുടെയും സാമൂഹ്യവിരുദ്ധരുടെയും താവളമായി മുക്കം. രാത്രിയുടെ മറവില്‍ പൊതുമുതലുകളടക്കമുള്ളവ നശിപ്പിക്കുന്നത് മുക്കത്തു നിത്യസംഭവമായിരിക്കുകയാണ്.
മുക്കം അഗസ്ത്യന്‍മുഴി റോഡില്‍ ഫയര്‍‌സ്റ്റേഷനു സമീപം കച്ചവടം നടത്തുന്ന കാരശ്ശേരി വലികതൊടിക ബാലന്റെ പെട്ടിക്കട സാമൂഹ്യവിരുദ്ധര്‍ ഇന്നലെ രാത്രി തീയിട്ട് നശിപ്പിച്ചു. യാത്രക്കാര്‍ അറിയിച്ചതിനെ തുടര്‍ന്ന് മുക്കം ഫയര്‍ഫോഴ്‌സ് എത്തി തീയണക്കുകയായിരുന്നു.
75000 രൂപയുടെ നാശനഷ്ടം ഉണ്ടായതയായി ഉടമ പറഞ്ഞു. സാമൂഹ്യവിരുദ്ധരുടെ ആക്രമണത്തില്‍ നാഷനല്‍ ഫൂട്പാത്ത് ഉന്തുവണ്ടി-പെട്ടിക്കട തൊഴിലാളി യൂനിയന്‍ പ്രതിഷേധിച്ചു. മുക്കത്തും പരിസരങ്ങളിലും പൊലിസ് പട്രോളിങ് ശക്തമാക്കണമെന്ന് അവര്‍ ആവശ്യപ്പെട്ടു. മുക്കം പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.