ന്യൂയോര്‍ക്ക്: അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് തങ്ങള്‍ക്കെതിരേ യുദ്ധം പ്രഖ്യാപിച്ചിരിക്കുകയാണെന്ന് ഉ.കൊറിയന്‍ വിദേശകാര്യ മന്ത്രി റി യോങ് ഹോ. കഴിഞ്ഞ ദിവസം കൊറിയന്‍ സൈനിക അതിര്‍ത്തിയില്‍ അമേരിക്ക ബോംബര്‍ വിമാനങ്ങള്‍ പറത്തിയ സംഭവത്തോട് ന്യൂയോര്‍ക്കില്‍ പ്രതികരിക്കുകയായിരുന്നു അദ്ദേഹം.
അമേരിക്കന്‍ ബോംബര്‍ വിമാനങ്ങള്‍ തകര്‍ക്കാനുള്ള അവകാശം ഉ.കൊറിയയ്ക്കുണ്ട്. അമേരിക്കയാണ് ആദ്യം യുദ്ധം പ്രഖ്യാപിച്ചത്. അക്കാര്യം ലോകം മറക്കരുത്-റി യോങ് പറഞ്ഞു.
അതിനിടെ, അമേരിക്കയും ഉ.കൊറിയയും വാചകകസര്‍ത്ത് അവസാനിപ്പിക്കണമെന്ന് ആവശ്യപ്പെട്ട് ചൈന രംഗത്തെത്തി. ഇരുരാജ്യങ്ങളുടെയും നിലപാട് വന്‍ ദുരന്തമാണ് വരുത്തിവയ്ക്കുകയെന്നും അതിനാല്‍ പ്രകോപനങ്ങളില്‍നിന്നു പിന്‍മാറണമെന്നും ചൈന ആവശ്യപ്പെട്ടു.