അബൂദബി: ലോകത്തിലെ ഏറ്റവും ഭാരമേറിയ വനിത ഇമാന്‍ അഹമ്മദ്(36) ഒടുവില്‍ മരണത്തിനു കീഴടങ്ങി. അബൂദബിയിലെ സ്വകാര്യ ആശുപത്രിയിലായിരുന്നു ഈജിപ്തിലെ അലക്‌സാന്‍ഡ്രിയ സ്വദേശിയായ ഇമാന്റെ അന്ത്യം. മാസങ്ങളായി ശരീരഭാരം കുറയ്ക്കാനുള്ള ചികിത്സയിലായിരുന്നു അവര്‍.
498 കിലോയോളമായിരുന്നു ഇമാന്റെ ഭാരം. ചികിത്സയുടെ ഭാഗമായി കഴിഞ്ഞ ഫെബ്രുവരിയില്‍ ഇമാന്‍ മുംബൈയിലും എത്തി. മുംബൈയിലെ സൈഫി ആശുപത്രിയില്‍നിന്ന് കഴിഞ്ഞ മെയിലാണ് അവരെ മലയാളിയായ ഡോ. ശംസീര്‍ വയലിലിന്റെ കീഴിലുള്ള അബൂദബിയിലെ ആശുപത്രിയിലേക്കു മാറ്റിയത്. അമിതവണ്ണം കാരണം 25 വര്‍ഷമായി കിടക്കയില്‍ കഴിയുന്ന ഇമാനെ ഈജിപ്തില്‍നിന്ന് മുംബൈയില്‍ കൊണ്ടുവരുമ്പോള്‍ മൂന്നുവര്‍ഷം മുന്‍പുണ്ടായ പക്ഷാഘാതത്തിന്റെ അവശതകളുമുണ്ടായിരുന്നു. മാര്‍ച്ചില്‍ ഭാരം കുറയ്ക്കാനുള്ള ബാരിയാട്രിക് ശസ്ത്രക്രിയ നടത്തി. ഇതിനുശേഷം ഭാരം 200 കിലോയില്‍ താഴെ എത്തിയതായാണ് ഡോക്ടര്‍മാരുടെ അവകാശവാദം. തുടര്‍ന്ന് ചികിത്സ പൂര്‍ത്തിയായതായി അറിയിച്ച് ഡോക്ടര്‍മാര്‍ ഇമാനെ ഡിസ്ചാര്‍ജ് ചെയ്യാന്‍ മുതിര്‍ന്നപ്പോള്‍ ബന്ധുക്കള്‍ പ്രതിഷേധിച്ചത് വാര്‍ത്തയായിരുന്നു.
തുടര്‍ന്നാണ് ഇമാനെ അബൂദബിയില്‍ തുടര്‍ചികിത്സയ്ക്കായി കൊണ്ടുപോയത്. അബൂദബിയിലെ ചികിത്സയെത്തുടര്‍ന്ന് ആദ്യമായി ഇമാനു തനിയെ ഭക്ഷണം കഴിക്കാനായതായി വാര്‍ത്തയുണ്ടായിരുന്നു.