യുനൈറ്റഡ് നേഷന്‍സ്: തെറ്റായ ചിത്രം ഉയര്‍ത്തിക്കാട്ടി യു.എന്‍ പൊതുസഭയില്‍ കരിവാരിത്തേക്കാന്‍ ശ്രമിച്ച് പാകിസ്താന് ഇന്ത്യയുടെ തിരിച്ചടി. ജമ്മുകശ്മീരില്‍ ഭീകരര്‍  തട്ടിക്കൊണ്ടുപോയി വധിച്ച സൈനികന്‍ ഉമര്‍ ഫയാസിന്റെ  ചിത്രം ഉയര്‍ത്തിക്കാണിച്ചാണ് ഇന്ത്യ പാകിസ്താന്റെ ആരോപണത്തെ തിരിച്ചടിച്ചത്.

കശ്മീരില്‍ ഇന്ത്യ നടത്തിയ അതിക്രമങ്ങളുടെ പടമെന്ന് പറഞ്ഞ് ഗസയിലെ പടം ഉയര്‍ത്തിക്കാട്ടി പാക് സ്ഥിരംപ്രതിനിധി മലീഹ ലോധി കഴിഞ്ഞദിവസം യു.എന്നില്‍ പ്രസംഗിച്ചിരുന്നു.
എന്നാല്‍ 2014ല്‍ ഗാസയില്‍ ഇസ്രാഈല്‍ വ്യോമാക്രമണത്തില്‍ പരിക്കേറ്റ പതിനേഴുകാരിയുടേ തായിരുന്നു ആ ചിത്രം. ഇക്കാര്യം ചൂണ്ടിക്കാട്ടിയാണ് യു.എന്‍. പൊതുസഭയില്‍ തിങ്കളാഴ്ച സംസാരിച്ച ഇന്ത്യന്‍ നയതന്ത്ര ഉദ്യോഗസ്ഥ പൗലോമി ത്രിപാഠി സംസാരിച്ചത്.


'ഈ ചിത്രം വ്യാജമല്ല; നിഷ്ഠുരവും ദുരന്തമയവുമായ യാഥാര്‍ഥ്യം വിളിച്ചുപറയുന്ന ചിത്രമാണിത്' ഫയാസിന്റെ ഫോട്ടോ ഉടര്‍ത്തിക്കാട്ടി പൗലോമി പറഞ്ഞു.

'2017 മേയില്‍ ലെഫ്റ്റനന്റ്  ഉമര്‍ ഫയാസിനെ ബന്ധുവിന്റെ വിവാഹച്ചടങ്ങിനിടെ തട്ടിക്കൊണ്ടുപോയി  പാകിസ്താന്‍ പിന്തുണയ്ക്കുന്ന ഭീകരര്‍ ക്രൂരമായി പീഡിപ്പിച്ച് കൊലപ്പെടുത്തുന്നു.
ഇന്ത്യന്‍ അതിര്‍ത്തിയിലെ, പ്രത്യേകിച്ച് കശ്മീരിലെ ജനങ്ങള്‍ ദിവസേന സഹിക്കേണ്ടിവരുന്ന ഈ യാഥാര്‍ഥ്യമാണ് പാകിസ്താന്‍ മറച്ചുവെക്കാന്‍ ശ്രമിക്കുന്നത്. പാകിസ്താന്റെ യഥാര്‍ഥമുഖം ആരില്‍നിന്നും ഒളിക്കാനാവില്ല' -പൗലോമി പറഞ്ഞു.

യു.എന്‍ പൊതുസഭയുടെ 72ാം സമ്മേളനത്തില്‍ സംസാരിക്കവെ വിദേശകാര്യ മന്ത്രി സുഷമസ്വരാജ് പാകിസ്താനെതിരെ ആഞ്ഞടിച്ചിരുന്നു. ഇതിന് മറുപടിയായാണ് വ്യാജ ചിത്രമുയര്‍ത്തി പാക് സ്ഥാനപതി രംഗത്തെത്തിയത്.