തിരൂരങ്ങാടി: പ്രസ്താവനകളിലും പ്രതികരണങ്ങളിലും സംഘടനാ പ്രതിനിധികള്‍ പക്വത പാലിക്കണമെന്നു പാണക്കാട് സയ്യിദ് ബഷീറലി ശിഹാബ് തങ്ങള്‍. 179ാം മമ്പുറം ആണ്ടുനേര്‍ച്ചയുടെ നാലാം ദിനമായ ഇന്നലെ മതപ്രഭാഷണ സദസ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
പരസ്പര സൗഹൃദത്തിലൂടെയാണ് പ്രതിരോധത്തിന്‍റെ മതില്‍കെട്ടുകള്‍ തീര്‍ക്കേണ്ടത്. മനുഷ്യനെ ഭിന്നിപ്പിക്കാനുള്ള ഉപാധികളായി മതങ്ങളെ മനസിലാക്കരുത്. മത ദര്‍ശനങ്ങളില്‍ നിറഞ്ഞുകാണുന്ന സഹിഷ്ണുതയും സഹവര്‍ത്തിത്വവും വീണ്ടെടുക്കുകയും രാഷ്ട്രീയ ലക്ഷ്യങ്ങള്‍ മുന്നില്‍കണ്ടു വിഭാഗീയത സൃഷ്ടിക്കുന്നവരെ ഒറ്റപ്പെടുത്തുകയും ചെയ്യണമെന്നു തങ്ങള്‍ ആവശ്യപ്പെട്ടു. കെ.സി മുഹമ്മദ് ബാഖവി അധ്യക്ഷനായി.
ദാറുല്‍ഹുദാ വിദ്യാര്‍ഥി സംഘടന അസാസ് പുറത്തിറക്കിയ വിശേഷം മമ്പുറം നേര്‍ച്ച സപ്ലിമെന്‍റ് കബീര്‍ ഹാജി ഓമച്ചപ്പുഴയ്ക്കു നല്‍കി ബഷീറലി തങ്ങള്‍ പ്രകാശനം ചെയ്തു. മുഹമ്മദ് സ്വാലിഹ് ഹുദവി തൂത പ്രഭാഷണം നടത്തി. വി.പി അബ്ദുല്ലക്കോയ തങ്ങള്‍ മമ്പുറം, ചെമ്മുക്കന്‍ കുഞ്ഞാപ്പു ഹാജി, കെ.എം സൈതലവി ഹാജി, യു. ശാഫി ഹാജി ചെമ്മാട്, അബ്ദുല്‍ ഖാദിര്‍ ഫൈസി അരിപ്ര, ജഅ്ഫര്‍ ഹുദവി ഇന്ത്യനൂര്‍, കെ.പി ശംസുദ്ദീന്‍ ഹാജി, എം.എ ചേളാരി, സി. യൂസുഫ് ഫൈസി മേല്‍മുറി, ഹംസ ഹാജി മൂന്നിയൂര്‍, മുക്ര അബൂബക്കര്‍ ഹാജി സംസാരിച്ചു.
പ്രഭാഷണ പരമ്പരയുടെ അവസാന ദിനമായ ഇന്നു റഷീദലി ശിഹാബ് തങ്ങള്‍ ഉദ്ഘാടനം ചെയ്യും. അന്‍വര്‍ മുഹ്യിദ്ദീന്‍ ഹുദവി ആലുവ മുഖ്യപ്രഭാഷണം നടത്തും. നാളെ പ്രാര്‍ഥനാ സദസും മമ്പുറം തങ്ങള്‍ അനുസ്മരണവും നടക്കും. വാവാട് കുഞ്ഞിക്കോയ മുസ്ലിയാര്‍ പ്രാര്‍ഥനയ്ക്കു നേതൃത്വം നല്‍കും. സമസ്ത ജനറല്‍ സെക്രട്ടറി കെ. ആലിക്കുട്ടി മുസ്ലിയാര്‍ ഉദ്ഘാടനം ചെയ്യും. ഡോ. ബഹാഉദ്ദീന്‍ മുഹമ്മദ് നദ്വി അധ്യക്ഷനാകും.
മമ്പുറം സയ്യിദ് അലവി മൗലദ്ദവീല ഹിഫ്ളുല്‍ ഖുര്‍ആന്‍ കോളജില്‍നിന്നു ഖുര്‍ആന്‍ മനഃപാഠമാക്കിയ വിദ്യാര്‍ഥികള്‍ക്കുള്ള സര്‍ട്ടിഫിക്കറ്റ് വിതരണം നടക്കും. 28നു രാവിലെ 8.30 മുതല്‍ അന്നദാനം നടക്കും. ഉച്ചയ്ക്കു രണ്ടിനു നടക്കുന്ന മൗലിദ് ഖത്മ് ദുആയോടെ ഒരാഴ്ചത്തെ ആണ്ടുനേര്‍ച്ചയ്ക്കു കൊടിയിറങ്ങും.