ന്യൂഡല്‍ഹി: പ്രധാനമന്ത്രി നരേന്ദ്ര മോദി കഴിഞ്ഞദിവസം പ്രഖ്യാപിച്ച 'സൗഭാഗ്യ' പദ്ധതിയിലൂടെ സൗജന്യമായി വൈദ്യുതി ലഭിക്കില്ല. വൈദ്യുതി കണക്ഷന്‍ മാത്രമാണ് സൗജന്യമായി ലഭിക്കുക. എല്ലാവര്‍ക്കും വൈദ്യുതിയെന്ന വാഗ്ദാനത്തോടെയാണ് 'സൗഭാഗ്യ' പ്രഖ്യാപിച്ചത്.

പാവപ്പെട്ട കുടുംബങ്ങള്‍ക്ക് സൗജന്യമായി വൈദ്യുതി കണക്ഷന്‍ നല്‍കും. മറ്റു കുടുംബങ്ങള്‍ക്ക് 500 രൂപ ഈടാക്കും. ഇത് 10 തവണകളായി വൈദ്യുതി ബില്ലിന്റെ കൂടെയാവും പിടിക്കുക.

2018 ഡിസംബറിനകം നാലു കോടി കുടുംബങ്ങള്‍ക്ക് വൈദ്യുതി എത്തിക്കുകയാണ് 'സൗഭാഗ്യ' പദ്ധതിയുടെ ലക്ഷ്യം. സൗജന്യമായിരിക്കുമെന്നു പ്രഖ്യാപിച്ചതല്ലാതെ ഇത് എങ്ങനെയാണെന്നു മോദി വിശദമാക്കിയിരുന്നില്ല. കണക്ഷന്‍ മാത്രമാണ് സൗജന്യമെന്നാണ് പുതിയ വിശദീകരണം.

ഇത്രയും കണക്ഷന്‍ നല്‍കണമെങ്കില്‍ ഓരോ വര്‍ഷവും 28,000 മെഗാ വാട്ട് (80,000 യൂണിറ്റ്) വൈദ്യുതി ആവശ്യമുണ്ടെന്നാണ് പ്രതീക്ഷിക്കുന്നത്. യൂണിറ്റിന് ശരാശരി മൂന്നു രൂപ ഈടാക്കിയാല്‍ വൈദ്യുതി വിതരണ വകുപ്പിന് 24,000 കോടി രൂപ അധിക വരുമാനമുണ്ടാക്കാനാവുമെന്നും കണക്കുകൂട്ടുന്നു.