റിയാദ്: സ്‌പോണ്‍സര്‍ മര്‍ദിച്ചു മുറിയില്‍ പൂട്ടിയിട്ട മലയാളി ഹൗസ് ഡ്രൈവറെ സാമൂഹ്യ പ്രവര്‍ത്തകര്‍ രക്ഷപ്പെടുത്തി നാട്ടിലെത്തിച്ചു. കോട്ടയം എരുമേലി സ്വദേശി ജൈസലാണ് സ്‌പോണ്‍സറുടെ ക്രൂരതയെ  തുടര്‍ന്ന് മര്‍ദ്ദനമേറ്റു ഒരു ദിവസം മുഴുവന്‍ റൂമില്‍ ബന്ധനസ്ഥനായി കഴിയേണ്ടി വന്നത്. ഒടുവില്‍ സാമൂഹ്യ പ്രവര്‍ത്തകന്‍ ലത്തീഫ് തെച്ചിയുടെ  ഇടപെടലിനെ തുടര്‍ന്ന് മോചനം സാധ്യമാക്കി ഫൈനല്‍ എക്‌സിറ്റില്‍ നാട്ടിലേക്ക് മടങ്ങുകയായിരുന്നു.
      എട്ടു വര്‍ഷമായി സഊദിയില്‍ ഉണ്ടായിരുന്ന ജൈസല്‍ നേരത്തെയുണ്ടായിരുന്ന വിസ കാന്‍സല്‍ ചെയ്താണ് പുതിയ വിസയില്‍ എട്ടു മാസം മുന്‍പ് ഇവിടെയെത്തിയത്. സ്‌പോണ്‍സറുടെ വീടിനു പുറമെ ബന്ധുക്കളുടെ മറ്റു മൂന്നു വീടുകളിലും ജോലി ചെയ്യാന്‍ ജൈസല്‍ നിര്‍ബന്ധിക്കപ്പെടുകയും ചെയ്തു. എന്നാല്‍, ആവശ്യത്തിന് ഭക്ഷണമോ ശമ്പളമോ നല്‍കാനും  തയ്യാറായിരുന്നില്ല. പ്രശ്‌നങ്ങള്‍ സ്‌പോണ്‍സറോട് അവതരിപ്പിച്ചപ്പോള്‍ 24 മണിക്കൂറോളം റൂമില്‍ പൂട്ടിയിടുകയായിരുന്നു.
     ഫൈനല്‍ എക്‌സിറ്റിനായി എട്ടായിരം റിയാല്‍ വേണമെന്നു സ്‌പോണ്‍സര്‍  ആവശ്യപ്പെടുകയും ചെയ്തു. തുടര്‍ന്ന് വിഷയം അറിഞ്ഞ ലത്തീഫ് തെച്ചി പൊലിസിന്റെ സഹായത്തോടെ റൂമില്‍ നിന്നും മോചിപ്പിച്ച് സ്‌റേഷനില്‍ എത്തിക്കുകയായിരുന്നു. പിന്നീട് സ്‌പോണ്‍സറെ സ്‌റ്റേഷനിലേക്ക് വിളിപ്പിച്ചു പൊലിസ് ഒരു റിയാല്‍ പോലും നല്‍കാതെ ഫൈനല്‍ എക്‌സിറ്റ് തരപ്പെടുത്തി കൊടുക്കാന്‍ സ്‌പോണ്‍സറെ നിര്‍ബന്ധിക്കുകയായിരുന്നു. ഒടുവില്‍ ടിക്കറ്റും സ്‌പോണ്‍സര്‍ നല്‍കി.

ഒരു വര്‍ഷത്തിനിടെ ആറോളം ഹൗസ് ഡ്രൈവര്‍മാര്‍ സ്‌പോണ്‍സറുടെ വീട്ടില്‍ വന്നു പോയിട്ടുണ്ടെന്നും ജൈസല്‍ പറഞ്ഞു.

 പടം:പീഡനത്തിനിരയായ ജൈസല്‍ സാമൂഹ്യ പ്രവര്‍ത്തകര്‍ക്കൊപ്പം