കുമ്പള: ദുരൂഹ സാഹചര്യത്തില്‍ വളര്‍ത്തു മത്സ്യങ്ങള്‍ ചത്തൊടുങ്ങി. വിളവെടുക്കാന്‍ പാകമായ വളര്‍ത്തു മത്സ്യങ്ങളാണു ചത്തൊടുങ്ങിയത്. കുമ്പളയിലെ നായിക്കം മധുവിന്റെ ഉടമസ്ഥതയിലുള്ള മീന്‍വളര്‍ത്തു കുളങ്ങളിലാണു മത്സ്യങ്ങള്‍ കൂട്ടത്തോടെ ചത്തൊടുങ്ങിയത്. നാലു ലക്ഷം രൂപയുടെ നഷ്ടം കണക്കാക്കുന്നു. മധുവിന്റെ ഉടമസ്ഥതയില്‍ വീടിനു സമീപം നടത്തുന്ന മീന്‍വളര്‍ത്തു കുളങ്ങളിലെ ശുദ്ധജലത്തില്‍ വളരുന്ന മത്സ്യങ്ങളാണു കൂട്ടത്തോടെ ഇന്നലെ കാലത്തു ചന്തുപൊന്തിയത്.
വ്യാഴാഴ്ച രാവിലെ മത്സ്യങ്ങള്‍ക്കു ഭക്ഷണം നല്‍കുമ്പോള്‍ ഒരു കുഴപ്പവും ഉണ്ടായിരുന്നില്ലെന്നു പറയുന്നു. ഇന്നലെ രാവിലെ മത്സ്യങ്ങള്‍ക്കു ഭക്ഷണം നല്‍കാനായി കുളത്തിലെത്തിയപ്പോഴാണു മത്സ്യങ്ങള്‍ ചത്തൊടുങ്ങിയ നിലയില്‍ കാണുന്നത്.
സംഭവം സംബന്ധിച്ചു പരിശോധന നടത്തുമെന്നു സ്ഥലത്തെത്തിയ ഫിഷറിസ് വകുപ്പ് ഉദ്യോഗസ്ഥര്‍ പറഞ്ഞു. സംഭവമറിഞ്ഞു പ്രദേശത്തു നിരവധി പേര്‍ എത്തി. കുമ്പള പഞ്ചായത്തു പ്രസിഡന്റും അംഗങ്ങളും സ്ഥലം സന്ദര്‍ശിച്ചു.