ന്യൂഡല്‍ഹി: മുതിര്‍ന്ന കോണ്‍ഗ്രസ് നേതാവും മുന്‍കേന്ദ്രമന്ത്രിയുമായ മഖന്‍ലാല്‍ ഫോത്തേദാര്‍ അന്തരിച്ചു. മുന്‍പ്രധാനമന്ത്രിമാരായ ഇന്ദിരാ ഗാന്ധിയുടെയും രാജിവ് ഗാന്ധിയുടെയും പൊളിറ്റിക്കല്‍ സെക്രട്ടറിയായിരുന്ന അദ്ദേഹം വാര്‍ധക്യസഹജമായ അസുഖത്തെ തുടര്‍ന്ന് ചികിത്സയിലായിരുന്നു. ഗുഡ്ഗാവിലെ ആശുപത്രിയില്‍ ഇന്നലെ വൈകുന്നേരത്തോടെയായിരുന്നു അന്ത്യം. 85 വയസായിരുന്നു.1950കളില്‍ നെഹ്‌റുവിന്റെ രാഷ്ട്രീയനിലപാടില്‍ ആകൃഷ്ടനായി കോണ്‍ഗ്രസിലെത്തിയ അദ്ദേഹം പിന്നീട് പാര്‍ട്ടിയിലെ ശക്തനായ നേതാവായി മാറി. 1980ല്‍ പ്രധാനമന്ത്രിയായിരുന്ന ഇന്ദിരാഗാന്ധിയുടെ പൊളിറ്റിക്കല്‍ സെക്രട്ടറിയായിരുന്ന അദ്ദേഹം അവരുടെ മരണശേഷം അധികാരത്തിലെത്തിയ രാജിവ് ഗാന്ധിയുടെയും പൊളിറ്റിക്കല്‍ സെക്രട്ടറിയായിരുന്നു. കേന്ദ്രമന്ത്രിസഭയില്‍ കാബിനറ്റ് മന്ത്രിയായും സേവനമനുഷ്ഠിച്ച അദ്ദേഹം കോണ്‍ഗ്രസ് പ്രവര്‍ത്തക സമിതിയിലും അംഗമായിരുന്നു. നിലവില്‍ പ്രവര്‍ത്തക സമിതിയിലെ സ്ഥിരം ക്ഷണിതാവായിരുന്നു.