പഞ്ച്കുല: സ്ത്രിപീഡന കേസില്‍ ജയിലില്‍ കഴിയുന്ന വിവാദ ആള്‍ദൈവം ഗുര്‍മീത് റാം റഹിം സിങ്ങിന്റെ ദേര ആസ്ഥാനത്ത് നടത്തിയ പരിശോധനയില്‍ ഒട്ടേറെ ക്രമക്കേടുകള്‍ കണ്ടെത്തിയതായി പൊലിസ്. ഒരു കോടിയിലധികം വിലവരുന്ന നിരവധി ആഡംബര കാറുകളാണ് ദേര ആസ്ഥാനത്ത് നിന്ന് കണ്ടെത്തിയത്. ഗുര്‍മീതിനെതിരായ വിധി വന്ന ദിവസം അദ്ദേഹത്തെ കോടതിയിലേക്ക് അനുഗമിച്ചത് എട്ട് എസ്.യു.വി വാഹനങ്ങളായിരുന്നു. ഇതില്‍ ഒരെണ്ണം ബുള്ളറ്റ് പ്രൂഫ് വാഹനമായിരുന്നു. ഇത്തരമൊരു വാഹനം ആരാണ് ഗുര്‍മീതിന് അനുവദിച്ചതെന്ന് കണ്ടെത്താന്‍ പൊലിസ് അന്വേഷണം തുടങ്ങിയിട്ടുണ്ട്. ഈ വര്‍ഷം മാര്‍ച്ച് 24ന് ഇന്ത്യന്‍ വിപണിയില്‍ പുതിയതായി ഇറങ്ങിയ ടയോട്ടയുടെ മൂന്ന് ആഡംബര കാറുകളായ ആര്‍.എക്‌സ് 450 എച്ച്, ഇ.എസ് 330 എച്ച്, എല്‍.എക്‌സ് 450 ഡി-570 എന്നിവയും ഗുര്‍മീതിന്റെ വാഹന ശേഖരത്തിലുണ്ട്.