കാസര്‍കോട്: സ്വാതന്ത്ര്യദിനാഘോഷത്തിന്റെ ഭാഗമായി 15 നു എസ്.കെ.എസ്.എസ്.എഫ് സംഘടിപ്പിക്കുന്ന ഫ്രീഡം സ്‌ക്വയര്‍ ജില്ലയില്‍ 11 കേന്ദ്രങ്ങളില്‍ നടക്കും. ഹൊസങ്കടി, മൊഗ്രാല്‍, ഉളിയത്തടുക്ക, ചെര്‍ക്കള, പള്ളങ്കോട്, നെല്ലിക്കട്ട, നോര്‍ത്ത് കോട്ടച്ചേരി, ഉദുമ, കുന്നുംകൈ, നീലേശ്വരം, തൃക്കരിപ്പൂര്‍ ടൗണ്‍ എന്നിവിടങ്ങളിലാണ് ഫ്രീഡം സ്‌ക്വയര്‍ നടക്കുക. രാജ്യത്തിന്റെ ജനാധിപത്യ സംവിധാനം ശക്തിപ്പെടുത്താനും സാമുദായിക സൗഹാര്‍ദത്തിനു വിള്ളലുണ്ടാക്കുന്ന മതേതര ശക്തികളെ ചെറുത്തു നില്‍ക്കാനും പുതുതലമുറക്ക് പ്രചോദനം നല്‍കുകയാണ് ഫ്രീഡം സ്‌ക്വയര്‍ ലക്ഷ്യമാക്കുന്നത്. വിവിധ കേന്ദ്രങ്ങളില്‍ ചെര്‍ക്കളം അബ്ദുല്ല, പി.ബി അബ്ദുറസാഖ് എം.എല്‍ എ, ഡോ. ഖത്തര്‍ ഇബ്രാഹിം ഹാജി കളനാട്, മെട്രോ മുഹമ്മദ് ഹാജി, സുഹൈര്‍ അസ്ഹരി പള്ളങ്കോട് തുടങ്ങിയ പ്രമുഖര്‍ ഉദ്ഘാടനം ചെയ്യും. തൃക്കരിപ്പൂര്‍ മേഖല ഫ്രീഡം സ്‌ക്വയര്‍ തൃക്കരിപ്പൂര്‍ ബസ് സ്റ്റാന്‍ഡില്‍ എസ്.കെ.എസ്.എസ്.എഫ്  ജില്ലാ പ്രസിഡന്റ്   താജുദ്ധീന്‍ ദാരിമി പടന്ന  ഉദ്ഘാടനം ചെയ്യും. ഖലീലുറഹ്മാന്‍ അല്‍ ഖാഷിഫി ഷാര്‍ജ പ്രമേയ പ്രഭാഷണം നടത്തും.
പരിപാടിയുടെ ഭാഗമായി ജില്ലയില്‍ വിവിധ പ്രചാരണ പരിപാടികള്‍ക്ക് തുടക്കമായി. കാസര്‍കോട് മേഖലയില്‍ മേഖലാ പ്രസിഡന്റ് ഹനീഫ് മൗലവിയുടെയും ജനറല്‍ സെക്രട്ടറി ഇര്‍ഷാദ് ഹുദവി ബെദിരയുടെയും നേതൃത്വത്തില്‍ ക്ലസ്റ്റര്‍ പര്യടനം തുടങ്ങി. പുതിയ ബസ് സ്റ്റാന്‍ഡ് സമസ്ത ഓഫിസില്‍ നടന്ന പരിപാടിയില്‍ എസ്.കെ.എസ്.എസ്.എഫ് ജില്ലാ ജനറല്‍ സെക്രട്ടറി ഹാരിസ് ദാരിമി ബെദിര, മേഖലാ പ്രസിഡന്റ് ഹനീഫ് മൗലവി ഉളിയത്തടുക്കക്കു പതാക കൈമാറി ഉദ്ഘാടനം ചെയ്തു. എസ്.വൈ.എസ് മണ്ഡലം സെക്രട്ടറി എം.എ ഖലീല്‍, സുഹൈല്‍ ഫൈസി കമ്പാര്‍, ഹാരിസ് ബെദിര, ശിഹാബ് അണങ്കൂര്‍, അബൂബക്കര്‍ സിദ്ധീഖ് കമ്പാര്‍, ജംഷീര്‍ തുടങ്ങിയവര്‍ സംബന്ധിച്ചു.