കൊണ്ടോട്ടി: കരിപ്പൂര്‍ വിമാനത്താവളത്തില്‍ സഹയാത്രികന്റെ ബാഗ് മോഷ്ടിച്ച യാത്രക്കാരന്‍ അറസ്റ്റില്‍. തിരൂര്‍ പൂക്കയില്‍ സ്വദേശി മുണ്ടോടന്‍ ബഷീറിനെയാണ്(46)കരിപ്പൂര്‍ പൊലിസ് അറസ്റ്റ് ചെയ്തത്. കഴിഞ്ഞ 14നാണ് കേസിനാസ്പദമായ സംഭവം. ദമാമില്‍ നിന്നുള്ള ജെറ്റ് എയര്‍വേയ്‌സ് വിമാനത്തില്‍ കരിപ്പൂരിലെത്തിയ കണ്ണൂര്‍ മട്ടന്നൂര്‍ ശിവപുരം സ്വദേശി അഷ്‌റഫിന്റെ ബാഗാണ് മോഷണം പോയത്. ബാഗില്‍ മൊബൈല്‍ ഫോണ്‍, പവര്‍ ബാങ്ക്, ചാര്‍ജര്‍ ഉള്‍പ്പെടെ 30,000 രൂപ വിലയുളള സാധനങ്ങളുണ്ടായിരുന്നു. കരിപ്പൂരിലെ കസ്റ്റംസ് ഹാളിലെത്തിയപ്പോള്‍ ബാഗ് കാണാതായി. തുടര്‍ന്ന് കരിപ്പൂര്‍ പൊലിസില്‍ പരാതി നല്‍കുകയായിരുന്നു. പൊലിസ് സി.സി.ടി.വി ദൃശ്യങ്ങള്‍ പരിശോധിച്ചതിനെ തുടര്‍ന്നാണ് അറസ്റ്റ്. കസ്റ്റംസ് ഹാളില്‍ എക്‌സ്‌റേ പരിശോധനക്കിടെയാണ് മോഷണം നടന്നത്. ബഷീറിനെ സ്‌റ്റേഷനിലേക്ക് വിളിച്ചുവരുത്തിയായിരുന്നു അറസ്റ്റ്. ദമാമില്‍ നിന്ന് ഒരേ വിമാനത്തിലാണ് ഇരുവരും കരിപ്പൂരിലെത്തിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.