ചെറുതുരുത്തി: മഞ്ചേരിയില്‍ നിന്ന് ആറ് ലക്ഷം രൂപയുടെ കള്ളനോട്ട് പിടികൂടിയ സംഭവവുമായി ബന്ധപ്പെട്ട് ചെറുതുരുത്തിയിലെ കള്ളനോട്ടടി കേന്ദ്രം പൊലിസ് സീല്‍ ചെയ്തു. സംസ്ഥാനമൊട്ടുക്ക് ബന്ധങ്ങളുള്ള സംഘമാണ് കള്ളനോട്ട് വിതരണത്തിന് പിന്നിലെന്ന് ഉദ്യോഗസ്ഥര്‍ക്ക് സൂചന ലഭിച്ചിട്ടുണ്ട്. പിടികൂടിയ പ്രതികളുടെ മൊഴിയുടെ അടിസ്ഥാനത്തില്‍ കഴിഞ്ഞ രാത്രി പൊലിസ് ചെറുതുരുത്തിയിലെത്തുകയും 2000 രൂപ നോട്ടുകള്‍ പ്രിന്റ് ചെയ്യാനുപയോഗിച്ച പ്രിന്ററുകളും സ്‌കാനര്‍, പേപ്പര്‍, സുരക്ഷാത്രെഡുകള്‍ എന്നിവ പിടിച്ചെടുക്കുകയും ചെയ്തിരുന്നു.
മഞ്ചേരി അഡീഷനല്‍ എസ്.ഐ അബ്ദുല്‍റഹ്മാന്റെ നേതൃത്വത്തിലുള്ള പൊലിസ് സംഘമാണ് ചെറുതുരുത്തിയിലെത്തിയത്. ചെറുതുരുത്തി ഗവ. ഹയര്‍ സെക്കന്‍ഡറി സ്‌കൂളിന് പുറകിലുള്ള വാടക വീട്ടിലാണ് പ്രതികള്‍ കള്ളനോട്ട് അടിച്ചിരുന്നത്. അതിനിടെ ചെറുതുരുത്തിയിലെ വാടക വീട്ടില്‍ വല്ലപ്പോഴും മാത്രം വന്നിരുന്ന സംഘാംഗങ്ങള്‍ മലപ്പുറത്ത് വിവിധ സ്ഥാപനങ്ങളില്‍ ജോലി ചെയ്യുന്ന ഉദ്യോഗസ്ഥരാണെന്നാണ് നാട്ടുകാരെ അറിയിച്ചിരുന്നത്.