ദമാം: ബഹറൈനില്‍ നിന്നും സഊദി വഴി ദുബായിലേക്ക് പോയ യാത്ര സംഘത്തിന്റെ കാര്‍ അപകടത്തില്‍ പെട്ട് രണ്ടു മലയാളികള്‍ മരിച്ചു. മലപ്പുറം, കണ്ണൂര്‍ സ്വദേശികളാണ് മരിച്ചത്. സഊദി അതിര്‍ത്തി പ്രദേശമായ സല്‍വയിലാണ് ഇന്നലെ രാവിലെ അപകടമുണ്ടായത്.

മലപ്പുറം മങ്കട സ്വദേശി അജിത്, കണ്ണൂര്‍ പയ്യന്നൂര്‍ കരിപ്പായി പെരുമ്പടവ് അജിത് എന്നിവരാണ് മരിച്ചത്. അപകടത്തില്‍ പരുക്കേറ്റ രണ്ടു പേരില്‍ ഒരാള്‍ അല്‍ഹസ ആശുപത്രിയിലും മറ്റൊരാള്‍ സല്‍വ ആശുപത്രിയിലും ചികിത്സയിലാണ്.

ഇവര്‍ സഞ്ചരിച്ചിരുന്ന കാര്‍ ട്രെയിലറുമായി കൂട്ടിയിടിച്ചാണ് അപകടമുണ്ടായത്. ഡ്രൈവര്‍ ഉറങ്ങിപ്പോയതാണ് കാരണമെന്ന് കരുതുന്നു. ഡ്രൈവര്‍ പ്രസാദ്, കൂടെയുണ്ടായിരുന്ന വിനോദ് എന്നിവര്‍ക്കാണ് പരുക്കേറ്റത്. ഇവരുടെ പരുക്കുകള്‍ സാരമുള്ളതല്ല. മൃതദേഹങ്ങള്‍ സല്‍വ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. സഹായത്തിനായി സാമൂഹ്യ പ്രവര്‍ത്തകര്‍ രംഗത്തുണ്ട്. ബഹ്‌റൈനില്‍ നിന്നും സഊദി വഴി ദുബൈയിലേക്ക് കരമാര്‍ഗ്ഗം 937 കിലോമീറ്റര്‍ ദൂരമാണുള്ളത്.