'പരല്‍മീന്‍ നീന്തുന്ന പാടം' വായിച്ച് സി.വി ബാലകൃഷ്ണന്റെ ആരാധകനായ ഒരാളാണ് ഞാന്‍. അതായത് വളരെ അടുത്തുമാത്രം സി.വിയെ വായിച്ചുതുടങ്ങി അദ്ദേഹത്തെ മനസില്‍ ഏറ്റുപിടിച്ച ഒരാള്‍. സുഹൃത്ത് നിര്‍ദേശിച്ചതനുസരിച്ചാണ് ആ പുസ്തകം വാങ്ങിവായിക്കുന്നത്. പിന്നീട് അദ്ദേഹത്തിന്റെ മിക്കവാറും കൃതികളും തിരഞ്ഞുപിടിച്ചു വായിച്ചു. ആയുസിന്റെ പുസ്തകവും കണ്ണാടിക്കടലും കാമമോഹിതവും ലൈബ്രേറിയനും മഞ്ഞുപ്രതിമയും സ്‌നേഹവിരുന്നുമെല്ലാം. എന്റെ പ്രായം വച്ച് ഒരു പത്തുകൊല്ലം മുന്‍പു വായിച്ചിരിക്കേണ്ട ഒരാളെ വളരെ വൈകി കണ്ടുമുട്ടിയ നഷ്ടബോധമാണെനിക്കിപ്പോഴുള്ളത്.
എഴുത്തുവീഥിയില്‍ 50 വര്‍ഷങ്ങളാണ് ആ കൃതഹസ്തന്‍ പിന്നിട്ടിരിക്കുന്നുവെന്ന് അറിഞ്ഞ് അദ്ദേഹത്തിന്റെ കൃതികള്‍ വായിക്കുമ്പോള്‍ ഏറെ ആശ്ചര്യം തോന്നും. നിറയൗവനമാണ് ആ എഴുത്തുകളിലെല്ലാം തെളിഞ്ഞുനില്‍ക്കുന്നത്. പുതുകാലത്തോട്, അതിന്റെ സ്വഭാവവൈജാത്യങ്ങളോട് അന്യതാത്വമില്ലാതെ സംവദിക്കാന്‍ കഴിയുന്ന അപൂര്‍വം എഴുത്തുകാരില്‍ ഒരാളാണ് സി.വി ബാലകൃഷ്ണന്‍. 50 വര്‍ഷത്തെ എഴുത്തനുഭവങ്ങള്‍ വായനക്കാരോട് പങ്കുവയ്ക്കാന്‍ കാണിച്ച നല്ല മനസിന് അദ്ദേഹത്തോട് നന്ദി. എഴുത്തിലും ജീവിതത്തിലും കൂടുതല്‍ ആയുസിനായി പ്രാര്‍ഥന. അഭിമുഖകാരനും 'ഞായര്‍ പ്രഭാത'ത്തിനും നന്ദികള്‍.