റിയാദ്: സ്ത്രീകള്‍ക്കു കൂടുതല്‍ മേഖലകളിലേക്ക് അനുമതി നല്‍കുന്ന സഊദിയില്‍ ഇനി ഇസ്‌ലാമിക വിധിവിലക്കുകള്‍ വിശദീകരിച്ചുനല്‍കുന്ന ഫത്‌വാ രംഗത്തും സ്ത്രീകള്‍ വന്നേക്കും. സഊദി ഉന്നതാധികാര സഭയായ ശൂറ കൗണ്‍സില്‍ ഇക്കാര്യം അംഗീകരിച്ചതായി അറബ് ന്യൂസ് റിപ്പോര്‍ട്ട് ചെയ്തു. ഫത്‌വ പുറപ്പെടുവിക്കാനുള്ള വനിതാ മുഫ്തിമാരെ സഊദി റോയല്‍ കോര്‍ട്ട് തീരുമാനിക്കുമെന്നും പത്രം പറയുന്നു.
ഫത്‌വ പുറപ്പെടുവിക്കുന്ന ഉന്നതാധികാര സമിതിയില്‍ ഇതുവരെ പുരുഷന്മാരാണ് ഉണ്ടണ്ടായിരുന്നത്. ഈ മേഖലയിലേക്കു സ്ത്രീകളെയും നിയമിക്കണമെന്ന നിയമം 107 വോട്ടുകള്‍ക്കാണ് ശൂറാ കൗണ്‍സില്‍ പാസാക്കിയത്. കൗണ്‍സിലിന്റെ 49-ാം യോഗത്തിലാണ് ശൂറ കൗണ്‍സില്‍ അംഗം ഇതു സംബന്ധിച്ച ചര്‍ച്ച മുന്നോട്ടുവച്ചത്. 'ജനറല്‍ പ്രസിഡന്‍സി ഓഫ് സ്‌കോളര്‍ലി റിസര്‍ച്ച് ആന്‍ഡ് ഇഫ്താ' എന്ന പേരിരുള്ള സര്‍ക്കാര്‍ അതോറിറ്റിയാണ് സഊദി ഫത്‌വ പ്രസിദ്ധീകരിക്കുന്നത്. അതോറിറ്റിയില്‍ സ്ത്രീകള്‍ക്കു പ്രത്യേക വിഭാഗം വേണമെന്ന ആവശ്യമാണ് ശൂറ കൗണ്‍സില്‍ മുന്നോട്ടുവച്ചത്.
ഫത്‌വ നല്‍കാനുള്ള അധികാരം പുരുഷന്മാരില്‍ മാത്രമായി ഒതുക്കരുതെന്ന് ശൂറ കൗണ്‍സില്‍ അംഗങ്ങള്‍ കഴിഞ്ഞ മാര്‍ച്ചില്‍ ആവശ്യപ്പെട്ടിരുന്നു. ഇസ്‌ലാമിക വിധിവിലക്കുകള്‍ ആഴത്തില്‍ പഠിച്ച സ്ത്രീകള്‍ക്കും ഫത്‌വ നല്‍കാനുള്ള അനുമതി നല്‍കണമെന്നും ഇവര്‍ ആവശ്യപ്പെട്ടു. ഇസ്‌ലാമിക ശരീഅത്തില്‍ പങ്കാളികളാകാന്‍ സ്ത്രീകള്‍ക്ക് അനുമതി നല്‍കുന്നതിന്റെ ഭാഗമായി ആവശ്യമായ സഹായങ്ങള്‍ ചെയ്യാന്‍ ജനറല്‍ പ്രസിഡന്‍സിയോട് കൗണ്‍സില്‍ ആവശ്യപ്പെട്ടിട്ടുണ്ട്. ഇസ്‌ലാമിക വിധിവിലക്കുകള്‍ നിജപ്പെടുത്തി ഫത്‌വ നല്‍കുന്ന മുഫ്തിമാരില്‍ വനിതകളെ ഉള്‍പ്പെടുത്തുന്നത് സഊദി ചരിത്രത്തിലെ പ്രധാന നാഴിക കല്ലാണെന്ന് നായിഫ് കോളജ് ഓഫ് നാഷനല്‍ സെക്യൂരിറ്റിയിലെ പ്രൊഫസര്‍ സഅദ് അല്‍ ഖുവൈ പറഞ്ഞു.