റിയാദ്: ലോകത്തിന്റെ വിവിധ ഭാഗങ്ങളില്‍ കഷ്ടത അനുഭവിക്കുന്നവര്‍ക്ക് സാന്ത്വനമേകുന്ന കിങ് സല്‍മാന്‍ റിലീഫ് സെന്ററിന് യൂറോപ്യന്‍ യൂനിയന്റെ അഭിനന്ദനം. സെന്ററിന്റെ പ്രവര്‍ത്തനങ്ങള്‍ വിലയിരുത്തി വംശീയമോ മതപരമോ ആയ വിവേചനം ഇല്ലാതെയാണ് ഇത് പ്രവര്‍ത്തിക്കുന്നതെന്ന് യൂറോപ്യന്‍ യൂനിയന്‍ വിദേശ കാര്യ ഏജന്‍സി സെക്രട്ടറി ജനറല്‍ ജോണ് ബില്ലിയാര്‍ഡ് പറഞ്ഞു.
സഊദി റോയല്‍കോര്‍ട്ട് ഉപദേഷ്ടാവും കിങ് സല്‍മാന്‍ റിലീഫ് സെന്റര്‍ ജനറല്‍ സൂപ്പര്‍ വൈസറുമായ ഡോ. അബ്ദുല്ല ബിന്‍ അബ്ദുല്‍ അസീസ് അല്‍ റബീഅയുമായി ബ്രസല്‍സില്‍ നടന്ന കൂടിക്കാഴ്ച്ചയിലാണ് ജോണ് ബില്ലിയാര്‍ഡ് ഇക്കാര്യം പറഞ്ഞത്.
38 രാജ്യങ്ങളിലായി വിവിധ പദ്ധതികള്‍ നടത്തിയാണ് കിങ് അബ്ദുല്ല റിലീഫ് സെന്റര്‍ പ്രവര്‍ത്തനം. ഇവിടങ്ങളിലെ 108 മേഖലകളില്‍ പ്രാദേശിക അന്ത്രാഷ്ട്ര ഏജന്‍സികളുടെ സഹകരണത്തോടെ 23 പദ്ധതികള്‍ നടപ്പാക്കിയതായി അദ്ദേഹം പറഞ്ഞു.
മനുഷ്യത്വപരമായ പ്രവര്‍ത്തനം കാഴ്ച്ചവെക്കാന്‍ വിവിധ മേഖലകളില്‍ സഹകരിക്കാന്‍ ഇരു കൂട്ടരും ചര്‍ച്ചയില്‍ ധാരണയായി. യൂറോപ്യന്‍ യൂനിയന്‍ വികസന സമിതി അംഗം ഹോള്‍ഫിനി ജിയോര്‍ജിയുമായും അല്‍ റബീഅ കൂടിക്കാഴ്ച നടത്തി.