ആലപ്പുഴ: ഏഴാമത് കയര്‍ കേരള അഞ്ചിന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യുമെന്ന് ധനമന്ത്രി ഡോ. ടി.എം തോമസ് ഐസക് വാര്‍ത്താസമ്മേളനത്തില്‍ പറഞ്ഞു. 39 രാജ്യങ്ങളില്‍നിന്നായി 140 പ്രതിനിധികള്‍ ഇതിനകം കയര്‍ കേരളയില്‍ പേര് രജിസ്റ്റര്‍ചെയ്തു കഴിഞ്ഞു. 150 ആഭ്യന്തര പ്രതിനിധികളും മേളയില്‍ പങ്കെടുക്കും. ഒന്‍പതുവരെ അഞ്ചു ദിവസങ്ങളിലായാണ് മേള നടക്കുന്നത്. അന്തര്‍ദേശീയ പവലിയന്‍ പൊതുമരാമത്ത് മന്ത്രി ജി. സുധാകരനും ദേശീയ പവലിയന്‍ സിവില്‍ സപ്ലൈസ് മന്ത്രി പി. തിലോത്തമനും ടൂറിസം മ്യൂസിയം പവലിയന്‍ ഗതാഗത മന്ത്രി തോമസ് ചാണ്ടിയും ഉദ്ഘാടനം ചെയ്യും. വാര്‍ത്താസമ്മേളനത്തില്‍ എ.എം ആരിഫ് എം.എല്‍.എ, കയര്‍ കോര്‍പറേഷന്‍ ചെയര്‍മാന്‍ ആര്‍. നാസര്‍, കെ. പ്രസാദ് എന്നിവരും പങ്കെടുത്തു.