ഗുവാഹത്തി: അസമിനെ നിശ്ചലമാക്കി വീണ്ടും വെള്ളപ്പൊക്കം. സംസ്ഥാനത്തെ അഞ്ച് ജില്ലകളിലായി 78,000 ജനങ്ങളെയും 16,000 വളര്‍ത്തുമൃഗങ്ങളേയും വെള്ളപ്പൊക്കം ബാധിച്ചതായാണ് അസമിലെ ദുരന്തനിവാരണ മാനേജ്‌മെന്റ് അതോറിറ്റി അറിയിച്ചത്. ഈ വര്‍ഷം കനത്ത മഴയില്‍ വടക്കു കിഴക്കന്‍ സംസ്ഥാനങ്ങള്‍ പലതവണ വെള്ളപ്പൊക്കത്തിന്റെ പിടിയിലായിരുന്നു.
അസമിലും അയല്‍ സംസ്ഥാനങ്ങളായ അരുണാചല്‍ പ്രദേശ്, മേഘാലയയിലും കനത്ത മഴ തുടരുകയാണ്. അസമിലെ ലഖിംപൂര്‍, ദക്ഷിണ സല്‍മാര, ഗോള്‍പാറ, ഹോജായി, കാര്‍ബി ആങ്‌ലോങ് ജില്ലകളിലാണ് കനത്ത മഴയെതുടര്‍ന്ന് വെള്ളം പൊങ്ങിയത്. അസം-മേഘാലയ അതിര്‍ത്തിയിലെ ഗോള്‍പാറ ജില്ലയിലെ ഏഴ് റവന്യു സര്‍ക്കിളുകളിലെ 86 ഗ്രാമങ്ങളേയാണ് വെള്ളപ്പൊക്കം ബാധിച്ചത്. ഇവിടെ 41,000 പേരെ ബാധിച്ചപ്പോള്‍ ദക്ഷിണ സല്‍മാരയില്‍ 29,000 പേരെയാണ് വെള്ളപ്പൊക്കം ബാധിച്ചത്.
ഗൊലാഘട്ടിലെ നുമാലിഘട്ടിലൂടെ ഒഴുകുന്ന ധന്‍സിരി നദി കരകവിഞ്ഞ് ഒഴുകുകയാണ്. വെള്ളപ്പൊക്കം സാരമായി ബാധിച്ച ജില്ലകളില്‍ 18 ദുരിതാശ്വാസ കേന്ദ്രങ്ങള്‍ തുടങ്ങിയിട്ടുണ്ട്. ഗോള്‍പാറയില്‍ വെള്ളപ്പൊക്കത്തിലകപ്പെട്ട 30 പേരെ സംസ്ഥാന ഡിസാസ്റ്റര്‍ റെസ്‌പോണ്‍സ് ഫോഴ്‌സ് രക്ഷപ്പെടുത്തി.
വെള്ളപ്പൊക്കമുണ്ടായ ജില്ലകളില്‍ അടിയന്തര ദുരിതാശ്വാസ പ്രവര്‍ത്തനങ്ങള്‍ക്കായി ഡെപ്യൂട്ടി കമ്മിഷണര്‍ക്ക് നിര്‍ദേശം നല്‍കിയതായി മുഖ്യമന്ത്രി സര്‍ബാനന്ദ സോനോവാള്‍ അറിയിച്ചു. ദുരിതബാധിതര്‍ക്ക് ഭക്ഷണം, കുടിവെള്ളം, ബേബി ഫുഡ്, പുതപ്പ്, മരുന്ന് എന്നിവ എത്തിക്കാനും നിര്‍ദേശം നല്‍കിയിട്ടുണ്ട്.
ഈ വര്‍ഷമുണ്ടായ കനത്ത മഴയിലും വെള്ളപ്പൊക്കത്തിലും സംസ്ഥാനത്ത് 160 പേര്‍ മരിച്ചതായാണ് കണക്ക്.