കുന്നംകുളം: സിനിമാഗാനരംഗത്തെ അതുല്യ പ്രതിഭയായിരുന്ന എം.എസ് ബാബുരാജിന്റെ തെരഞ്ഞെടുത്ത ഗാനങ്ങളുമായി ഫോറം ഫോര്‍ ആര്‍ട്‌സ് ആന്റ് കള്‍ച്ചറല്‍ ഇവന്റ്‌സിന്റെ (ഫെയ്‌സ്) നേതൃത്വത്തില്‍ ബാബുരാജ് സംഗീത രാവ് സംഘടിപ്പിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഓഗസ്റ്റ് 17 ന് വൈകീട്ട് 6.30 ന് കുന്നംകുളം ബഥനി സക്കൂളില്‍ നടക്കുന്ന പരിപാടിയില്‍ പ്രശസ്ത ഗായകന്‍ മുസ്തഫ മാന്തോട്ടം ഗാനങ്ങള്‍ ആലപിക്കും. കഴിഞ്ഞ 37 വര്‍ഷമായി ഇന്ത്യയിലും വിദേശത്തുമായി സംഗീത ജീവിതം നയിക്കുന്ന ഇദ്ദേഹം സംഗീത സംവിധായകന്‍ കൂടിയാണ്. കുന്നംകുളത്തിന്റെ കലാസാംസ്‌ക്കരിക രംഗത്ത് കഴിഞ്ഞ അഞ്ച് വര്‍ഷമായി മികച്ച പ്രവര്‍ത്തനം നടത്തുന്ന സംഘടനയാണ് ഫെയ്‌സ്. ഭാരവാഹികളായ അഡ്വ.പ്രിനു.പി.വര്‍ക്കി, പി.ജി ജയപ്രകാശ്, പി.എസ് ഷാനു എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.