സ്വന്തം ലേഖിക
കൊച്ചി: കൊച്ചി മെട്രോ പാലാരിവട്ടത്തുനിന്ന് മഹാരാജാസ് ഗ്രൗണ്ട് വരെ ഇന്നുമുതല്‍ യാത്ര തുടങ്ങും. രാവിലെ 10.30ന് മുഖ്യമന്ത്രി പിണറായി വിജയന്‍ യാത്ര ഫ്‌ളാഗ് ഓഫ് ചെയ്യും. ജവഹര്‍ലാല്‍ നെഹ്‌റു സ്‌റ്റേഡിയം സ്റ്റേഷനിലാണ് ഫ്‌ളാഗ് ഓഫ് ചടങ്ങ് നടക്കുന്നത്. തുടര്‍ന്ന് കേന്ദ്രമന്ത്രി ഹര്‍ദീപ് സിങ് പുരി, മെട്രോമാന്‍ ഇ.ശ്രീധരന്‍, മേയര്‍, എം.പിമാര്‍, എം.എല്‍.എമാര്‍ തുടങ്ങിയവര്‍ മുഖ്യമന്ത്രിക്കൊപ്പം മഹാരാജാസ് ഗ്രൗണ്ട് സ്റ്റേഷന്‍വരെ കന്നിയാത്ര നടത്തും. ഇവര്‍ കലൂര്‍ സ്റ്റേഷനില്‍ തിരിച്ചെത്തിയതിനുശേഷം ടൗണ്‍ഹാളില്‍ ഉദ്ഘാടനചടങ്ങ് നടക്കും.
കേന്ദ്രമന്ത്രി ഹര്‍ദീപ് സിങ് പുരിയുടെ അധ്യക്ഷതയില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ മെട്രോയുടെ നഗര ഹൃദയയാത്ര ഉദ്ഘാടനം ചെയ്യും. പ്രതിപക്ഷ നേതാവ് രമേശ് ചെന്നിത്തല, എം.പിമാരായ പ്രൊഫ. കെ.വി.തോമസ്, ഇന്നസെന്റ്, എം.എല്‍.എമാരായ ഹൈബി ഈഡന്‍, വി.കെ.ഇബ്രാഹിം കുഞ്ഞ്, അന്‍വര്‍ സാദത്ത്, കെ.എം.ആര്‍.എല്‍ എം.ഡി ഏലിയാസ് ജോര്‍ജ് തുടങ്ങിയവര്‍ ചടങ്ങില്‍ സംബന്ധിക്കും. ഉദ്ഘാടനചടങ്ങിനുശേഷം മെട്രോ പൊതുജനങ്ങള്‍ക്കായി യാത്ര ആരംഭിക്കും.
ഒന്‍പത് ട്രെയിനുകളായിരിക്കും സര്‍വിസ് നടത്തുക. നഗരഹൃദയത്തില്‍ അഞ്ച് സ്റ്റേഷനുകളിലായിരിക്കും മെട്രോ നിര്‍ത്തുക. കുറഞ്ഞ സമയത്തിനുള്ളില്‍ ഗതാഗതക്കുരുക്കില്‍ പെടാതെ നഗരത്തില്‍ യാത്ര നടത്താമെന്നതാണ് പ്രത്യേകത. ആലുവയില്‍ നിന്ന് അരമണിക്കൂറിനുള്ളില്‍ വാണിജ്യനഗരിയിലേക്ക് എത്താന്‍ സാധിക്കും. ജവഹര്‍ലാല്‍ നെഹ്‌റുസ്റ്റേഡിയത്തില്‍ നിന്ന് മഹാരാജാസ് ഗ്രൗണ്ടിലേക്ക് വെറും ഏഴ് മിനിറ്റുകൊണ്ട് എത്താമെന്നാണ് കെ.എം.ആര്‍.എല്‍ അവകാശപ്പെടുന്നത്. മറ്റുജില്ലകളില്‍ നിന്ന് എറണാകുളത്തെത്തുന്നവര്‍ക്കും മെട്രോ യാത്ര പ്രയോജനം ചെയ്യുമെന്നാണ് വിലയിരുത്തല്‍. കെ.എസ്.ആര്‍.ടി.സി സ്റ്റാന്‍ഡ്, കലൂര്‍ ബസ് സ്്റ്റാന്‍ഡ്, നോര്‍ത്ത്, സൗത്ത് റെയില്‍വേ സ്‌റ്റേഷനുകള്‍ തുടങ്ങിയവയെല്ലാം പുതിയ മെട്രോ സ്‌റ്റേഷനുകള്‍ക്ക് സമീപമാണ് എന്നതാണ് കാരണം. ഇന്നലെ മെട്രോ ഉദ്ഘാടനത്തോടനുബന്ധിച്ച് കെ.എം.ആര്‍.എല്‍ മെട്രോ ഗ്രീന്‍ റണ്‍ സംഘടിപ്പിച്ചിരുന്നു.
പാലാരിവട്ടം മുതല്‍ മഹാരാജാസ് ഗ്രൗണ്ട് വരെ യാത്രാനിരക്ക് 30 രൂപയും ആലുവ മുതല്‍ ഗ്രൗണ്ടുവരെ 50രൂപയുമാണ്. ജവഹര്‍ലാല്‍ നെഹ്‌റു സ്റ്റേഡിയം, കലൂര്‍, ലിസി, എം.ജി റോഡ്, മഹാരാജാസ് കോളജ് ഗ്രൗണ്ട് എന്നിങ്ങനെ അഞ്ചു സ്റ്റേഷനുകളിലായിരിക്കും ട്രെയിന്‍ നിര്‍ത്തുക.