വഡോര: ഗുജറാത്തില്‍ ബി.ജെ.പി നേതാവിനെ ജനക്കൂട്ടം മരത്തില്‍ കെട്ടിയിട്ട് മര്‍ദിച്ചു. വഡോരയിലെ മുനിസിപ്പല്‍ കൗണ്‍സിലറായ ഹാശ്മുഖ് പട്ടേലിനെയാണ് ഇന്നലെ രാവിലെ ജനക്കൂട്ടം മരത്തില്‍ കെട്ടിയിട്ട് മര്‍ദിച്ചത്. കൗണ്‍സിലറെ ചീത്ത പറയുന്നതും മര്‍ദിക്കുന്നതുമായ വിഡിയോ സാമൂഹിക മാധ്യമങ്ങളില്‍ വ്യാപകമായിട്ടുണ്ട്. സംഭവവുമായി ബന്ധപ്പെട്ട് മുപ്പതോളം പേരെ പൊലിസ് അറസ്റ്റു ചെയ്തു.
നോട്ടിസില്ലാതെ മുനിസിപ്പാലിറ്റി അധികൃതര്‍ ചിലരുടെ വീടുകള്‍ പൊളിച്ചുവെന്നാരോപിച്ചാണ് കൗണ്‍സിലറെ ജനക്കൂട്ടം ആക്രമിച്ചത്. വീടു പൊളിച്ചതുമായി ബന്ധപ്പെട്ട് ചിലര്‍ മുനിസിപ്പാലിറ്റിയെ സമീപിച്ചപ്പോള്‍ കൗണ്‍സിലറുടെ കൈയില്‍ നോട്ടിസ് കൈമാറിയിട്ടുണ്ടെന്നായിരുന്നു വിശദീകരണം.
എന്നാല്‍ കൗണ്‍സിലറോട് നോട്ടിസ് സംബന്ധിച്ച് ചോദിക്കുന്നതിനിടെ ക്ഷുഭിതരായ ചിലര്‍ അദ്ദേഹത്തെ ആക്രമിക്കുകയായിരുന്നു. നോട്ടിസ് ലഭിച്ചിട്ടില്ലെന്ന് കൗണ്‍സിലര്‍ പറഞ്ഞെങ്കിലും ഇത് വകവെക്കാതെയായിരുന്നു ജനങ്ങളുടെ ആക്രമണം.