ന്യൂഡല്‍ഹി: ഉത്തര്‍പ്രദേശ് സര്‍ക്കാരിന്റെ വിനോദ സഞ്ചാര പട്ടികയില്‍ നിന്ന് താജ്മഹലിനെ ഒഴിവാക്കിയതിനെതിരേ പ്രതിഷേധം വ്യാപകം. നടപടിക്കെതിരേ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി രൂക്ഷമായ വിമര്‍ശനമാണ് ഉന്നയിച്ചത്. യു.പി മുഖ്യമന്ത്രി യോഗി ആദിത്യനാഥ് ഒന്നിനും കൊള്ളാത്ത ഭരണാധികാരിയാണെന്ന് പറഞ്ഞ രാഹുല്‍, സംസ്ഥാനത്തെ ഇരുട്ടിലേക്ക് നയിക്കുകയാണ് അദ്ദേഹം ചെയ്യുന്നതെന്നും ആരോപിച്ചു.
ലോകത്തെ ഏഴ് അല്‍ഭുതങ്ങളിലൊന്നാണ് താജ്മഹല്‍. യു.പിയില്‍ വര്‍ഗീയ കാഴ്ചപ്പാടിലൂടെ ഭരണം നടത്തുന്ന സര്‍ക്കാര്‍ ഇതിനെ വിനോദ സഞ്ചാര പട്ടികയില്‍ നിന്ന് ഒഴിവാക്കിയിരിക്കുകയാണെന്നും രാഹുല്‍ ആരോപിച്ചു. അതേസമയം താജ്മഹല്‍ ഇന്ത്യയുടെ സംസ്‌കാരത്തെ പ്രതിഫലിപ്പിക്കുന്നില്ലെന്നാണ് കഴിഞ്ഞ ദിവസം ബിഹാറില്‍ നടന്ന ഒരു പരിപാടിയില്‍ യോഗി അഭിപ്രായപ്പെട്ടത്.
യു.പി സര്‍ക്കാര്‍ താജ്മഹലിനെ ഒഴിവാക്കിയാലും അതിന്റെ പ്രൗഡിയെ ഇല്ലായ്മ ചെയ്യാന്‍ ആര്‍ക്കും കഴിയില്ലെന്ന് രാഹുല്‍ ഗാന്ധി അഭിപ്രായപ്പെട്ടു. ഒന്നിനും കൊള്ളാത്ത ഭരണാധികാരിയാണ് നഗരം ഭരിക്കുന്നതെന്ന ഹരിശ്ചന്ദ്രയുടെ ഒരു കവിത ഉദ്ധരിച്ചാണ് രാഹുല്‍ വിമര്‍ശനം ഉന്നയിച്ചത്.
കഴിഞ്ഞ ആഴ്ചയാണ് ഉത്തര്‍പ്രദേശ് സര്‍ക്കാര്‍ സംസ്ഥാനത്തെ വിനോദ സഞ്ചാര കേന്ദ്രങ്ങളുടെ പട്ടിക പ്രസിദ്ധീകരിച്ചത്. ഇതില്‍ നൈമിഷാരണ്യ, ചിത്രകൂടം ഉള്‍പ്പെടെയുള്ളവ സ്ഥാനം പിടിച്ചപ്പോള്‍ താജ്മഹലിനെ ഒഴിവാക്കുകയായിരുന്നു.
ലോകത്തെ വലിയൊരു വിഭാഗം ജനങ്ങളും താജ്മഹല്‍ കാണാന്‍ ആഗ്രഹിക്കുന്നുണ്ട്. ഇത് ഇന്ത്യയുടെ നിര്‍മിതിയാണ്. ചരിത്രത്തെ അവഗണിക്കുന്ന നടപടിയാണ് യോഗി സര്‍ക്കാരിന്റെ ഭാഗത്തുനിന്നുണ്ടായതെന്ന് സി.പി.എം പോളിറ്റ് ബ്യൂറോ അംഗം വൃന്ദ കാരാട്ട് ആരോപിച്ചു.