അഹമ്മദാബാദ്: ദളിത് യുവാക്കള്‍ക്കെതിരെ ഗുജറാത്തില്‍ ആക്രമണം തുടര്‍ക്കഥയാവുന്നു. മീശവെച്ചതിന് രണ്ട് ദളിത് യുവാക്കള്‍ ആക്രമിക്കപ്പെട്ടതിനു പിന്നാലെ വീണ്ടും ഇതേരീതിയില്‍ യുവാവിന് കുത്തേറ്റു. 17 കാരനായ ദിഗന്ദ് മഹേരിയയ്ക്കാണ് കുത്തേറ്റത്. ഗുജറാത്തിലെ ലിംബോദര ഗ്രാമത്തിലാണ് സംഭവം. ദിഗാന്തിന്റെ പുറത്ത് ബ്ലേഡ് കൊണ്ട് അക്രമികള്‍ വരയുകയായിരുന്നു.  സംഭവത്തില്‍ എഫ്.ഐ.ആര്‍ രജിസ്റ്റര്‍ ചെയ്തതായി  പൊലിസ്  പറഞ്ഞു. 

കഴിഞ്ഞ ദിവസം ഗാന്ധിനഗറിനു സമീപമുള്ള ഗ്രാമത്തില്‍ വെച്ച് രണ്ട് യുവാക്കല്‍ മേല്‍ജാതിക്കാരുടെ മര്‍ദ്ദനത്തിനിരയായിരുന്നു. സുഹൃത്തിനെ സന്ദര്‍ശിക്കാന്‍ ഗാന്ധിനഗറില്‍ എത്തിയ കൃനാല്‍ എന്ന മുപ്പതുകാരനെ സംഘം 'മീശ വച്ചാല്‍ രജപുത്രനാകില്ല' എന്നു പറഞ്ഞു കളിയാക്കിയശേഷം മര്‍ദിക്കുകയായിരുന്നു.

ലിംബോദര ഗ്രാമത്തില്‍ ഗര്‍ബ ചടങ്ങിനുശേഷം മടങ്ങുകയായിരുന്ന പര്‍മാറിനെ മീശ വച്ചതിന്റെ പേരില്‍ അപഹസിച്ചാണ് മൂന്നംഗ സംഘം മര്‍ദിച്ചത്.

ദളിതര്‍ക്കെതിരെയുള്ള ആക്രമണത്തില്‍ പ്രതിഷേധിച്ച് സാനന്ദിലെ ദളിത് യുവാക്കള്‍ തങ്ങളുടെ സോഷ്യല്‍മീഡിയ പ്രൊഫൈല്‍ പിരിച്ചുവെച്ച മീശയും മിസ്റ്റര്‍ ദളിത് എന്ന ഹാഷ്ടാഗും നല്‍കി കാംപെയിന്‍ ആരംഭിച്ചിട്ടുണ്ട്.