ന്യൂഡല്‍ഹി: ഗുജറാത്ത് തെരഞ്ഞെടുപ്പ് നടക്കാനിരിക്കേ പെട്രോള്‍, ഡീസല്‍ വിലകുറച്ച കേന്ദ്ര സര്‍ക്കാര്‍ നടപടി ജനങ്ങളെ വിഡ്ഢികളാക്കാനാണെന്ന് കോണ്‍ഗ്രസ്. കേന്ദ്ര സര്‍ക്കാര്‍ രണ്ട് രൂപ നിരക്കില്‍ പെട്രോളിനും ഡീസലിനും എക്‌സൈസ് ഡ്യൂട്ടി കുറച്ചത് ചൊവ്വാഴ്ചയായിരുന്നു. നേരത്തെ 3.56 രൂപ എക്‌സൈസ് ഡ്യൂട്ടിയുണ്ടായിരുന്നത് 17.33 ആയി വര്‍ധിപ്പിച്ച സര്‍ക്കാരാണ് മോദിയുടേത്. ഗുജറാത്തില്‍ ഭരണം തിരിച്ചു പിടിക്കുന്നതിനുവേണ്ടിയാണ് ഇപ്പോള്‍ രണ്ടു രൂപയുടെ കുറവ് വരുത്തിയിരിക്കുന്നതെന്ന് മുതിര്‍ന്ന കോണ്‍ഗ്രസ് നേതാവ് അര്‍ജുന്‍ മൊദ്്‌വാദിയ ആരോപിച്ചു.
2014ല്‍9.48 രൂപയായിരുന്നു എക്‌സൈസ് ഡ്യൂട്ടി. ഇത് മോദി അധികാരത്തില്‍ കയറിയതോടെ 22 രൂപയായി വര്‍ധിപ്പിക്കുകയായിരുന്നുവെന്നും അദ്ദേഹം ആരോപിച്ചു.
അപ്രതീക്ഷിതമായ വിലക്കയറ്റത്തിന് തെരഞ്ഞെടുപ്പില്‍ ജനങ്ങള്‍ തക്കതായ മറുപടി നല്‍കുമെന്ന കാര്യത്തില്‍ തര്‍ക്കമില്ല. ഇന്ധന വിലയില്‍ മൂന്നുവര്‍ഷത്തെ ഏറ്റവും വലിയ ഉയര്‍ച്ചയാണ് ഇപ്പോഴുള്ളത്. നികുതി വര്‍ധിപ്പിച്ചത് രാജ്യത്തിന്റെ ക്ഷേമ പദ്ധതികള്‍ക്കുവേണ്ടിയെന്നായിരുന്നു നേരത്തെ കേന്ദ്ര സര്‍ക്കാര്‍ പ്രഖ്യാപിച്ചിരുന്നത്. ഇപ്പോഴാകട്ടെ എക്‌സൈസ് ഡ്യൂട്ടി കുറച്ചത് തെരഞ്ഞെടുപ്പ് മുന്നില്‍ കണ്ടുകൊണ്ടുമാത്രമല്ലെയെന്നും അദ്ദേഹം ചോദിച്ചു.
ഇന്ധനവിലവര്‍ധനവിനെത്തുടര്‍ന്ന് പൊറുതി മുട്ടിയ ജനങ്ങള്‍ ബി.ജെ.പിക്ക് അനുയോജ്യമായ മറുപടി തെരഞ്ഞെടുപ്പില്‍ നല്‍കുമെന്ന് കോണ്‍ഗ്രസ് ഗുജറാത്ത് സംസ്ഥാന പ്രസിഡന്റ് ഭാരത് സിന്‍ഹ പറഞ്ഞു.