നെടുമ്പാശ്ശേരി: സംസ്ഥാന ഹജ്ജ് കമ്മിറ്റി വഴി പുറപ്പെട്ട ഹാജിമാരുടെ അവസാനസംഘവും തിരികെയെത്തി. ഇന്നലെ ഉച്ചയ്ക്ക് 11.45 ന് മദീനയില്‍ നിന്ന് 407 ഹാജിമാരെയും വഹിച്ചുകൊണ്ട് എത്തിയ സഊദി എയര്‍ലൈന്‍സിന്റെ എസ്.വി 5346 നമ്പര്‍ വിമാനം നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ പറന്നിറങ്ങിയതോടെ സംസ്ഥാന ഹജ്ജ് കമ്മിറ്റിയുടെ നേതൃത്വത്തിലുള്ള ഈ വര്‍ഷത്തെ ഹജ്ജ് ക്യാംപിന് പരിപൂര്‍ണ സമാപനമായത്്.
കേരളം, ലക്ഷദ്വീപ്, മാഹി എന്നിവിടങ്ങളില്‍ നിന്നായി 11807 പേരാണ് ഹജ്ജ് കമ്മിറ്റിയുടെ നേതൃത്വത്തില്‍ നെടുമ്പാശ്ശേരി ഹജ്ജ് ക്യാംപ് വഴി ഈ വര്‍ഷം യാത്രയായിരുന്നത്. ഇതില്‍ 11745 പേരാണ് 39 വിമാനങ്ങളിലായി നെടുമ്പാശ്ശേരിയില്‍ മടങ്ങിയെത്തിയത്. മൂന്ന് സ്ത്രീകള്‍ ഉള്‍പ്പെടെ 13 പേര്‍ അവിടെവച്ച് മരണപ്പെട്ടിരുന്നു. 47 പേര്‍ മറ്റ് യാത്രാ വിമാനങ്ങളില്‍ നേരത്തെ നാട്ടിലേക്ക് മടങ്ങിയിരുന്നു. ഒരു സ്ത്രീ അസുഖം മൂലം മക്കയില്‍ തങ്ങുന്നുണ്ട്. ഇവരെ പരിചരിക്കാന്‍ ഭര്‍ത്താവും കൂടെ നില്‍ക്കുകയാണ്. സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ്കുഞ്ഞ് മൗലവി, ഹജ്ജ് അസി.സെക്രട്ടറി ടി.കെ.അബ്ദുല്‍റഹ്മാന്‍, സ്‌പെഷല്‍ ഓഫിസര്‍ യു.അബ്ദുല്‍ കരീം, സെല്‍ ഓഫിസര്‍ അബ്ദുല്‍ ലത്തീഫ്, അസി.സെല്‍ ഓഫിസര്‍ എസ്.നജീബ്, ഹജ്ജ് കമ്മിറ്റി അംഗങ്ങള്‍, സ്വാഗതസംഘം ഭാരവാഹികള്‍ തുടങ്ങിയവരുടെ നേതൃത്വത്തിലാണ് മടങ്ങിയെത്തിയ ഹാജിമാരെ സ്വീകരിച്ച് ബന്ധുക്കളോടൊപ്പം യാത്രയാക്കിയത്. നെടുമ്പാശ്ശേരിയില്‍ നിന്ന് ജിദ്ദ വിമാനത്താവളം വഴി മക്കയിലെത്തിയ ഹാജിമാര്‍ മദീന വഴിയാണ് നാട്ടിലേക്ക് മടങ്ങിയത്.