ന്യൂഡല്‍ഹി: 2002ലെ ഗുജറാത്ത് വംശഹത്യാ കേസില്‍ പ്രധാനമന്ത്രി നരേന്ദ്രമോദിയെ കുറ്റവിമുക്തനാക്കിയ പ്രത്യേക അന്വേഷണ സംഘത്തിന്റെ (എസ്.ഐ.ടി) നടപടിയെ ചോദ്യം ചെയ്തു സാക്കിയാ ജാഫ്രി സമര്‍പ്പിച്ച ഹരജി ഹൈക്കോടതി തള്ളി.
കലാപത്തിനുപിന്നില്‍ വലിയ ഗൂഢാലോചനയുണ്ടെന്നതു സംബന്ധിച്ച വിഷയം ഗുജറാത്ത് മുന്‍ ഐ.പി.എസ് ഉദ്യോഗസ്ഥനായ സഞ്ജീവ് ഭട്ടിന്റെ കേസില്‍ സുപ്രിംകോടതി പരിഗണിച്ചതാണെന്നും അതിനാല്‍ ആ വിഷയത്തിലേക്ക് വീണ്ടും കടക്കുന്നില്ലെന്നും ഗുജറാത്ത് ഹൈക്കോടതി പറഞ്ഞു. കേസില്‍ കൂടുതല്‍ അന്വേഷണത്തിന് ഉത്തരവിടാന്‍ തങ്ങള്‍ക്കു കഴിയില്ലെന്ന് ജസ്റ്റിസ് സോണിയാ ഗൊക്കാനി പറഞ്ഞു. എസ്.ഐ.ടി റിപ്പോര്‍ട്ടിനെതിരേ അതേ കോടതി മുമ്പാകെയോ ഹൈക്കോടതി സിംഗിള്‍ ബെഞ്ചിനെയോ സുപ്രിംകോടതിയെയോ പരാതിക്കാര്‍ക്ക് സമീപിക്കാമെന്നും ജഡ്ജി അറിയിച്ചു. കലാപത്തിനുപിന്നില്‍ വലിയ ഗൂഢാലോന നടന്നുവെന്നതു വിശ്വസിക്കാന്‍ കഴിയില്ലെന്നും ജഡ്ജി പറഞ്ഞു.
കലാപത്തില്‍ കൊല്ലപ്പെട്ട കോണ്‍ഗ്രസ് നേതാവും മുന്‍ എം.പിയുമായ ഇഹ്‌സാന്‍ ജാഫ്രിയുടെ ഭാര്യ സാക്കിയാ ജാഫ്രിയ്‌ക്കൊപ്പം സാമൂഹിക പ്രവര്‍ത്തക ടീസ്റ്റാ സെത്തല്‍വാദും ഹൈക്കോടതിയില്‍ ഹരജി നല്‍കിയിരുന്നു. എസ്.ഐ.ടി റിപ്പോര്‍ട്ട് തള്ളണമെന്നും പുതിയ അന്വേഷണത്തിന് ഉത്തരവിടണമെന്നുമായിരുന്നു ഹരജിയില്‍ ഇരുവരും ആവശ്യപ്പെട്ടിരുന്നത്. സാക്കിയയുടെ ആവശ്യം തള്ളിയെങ്കിലും അവരോട് മറ്റൊരു കോടതിയെ സമീപിക്കാന്‍ ജഡ്ജി ആവശ്യപ്പെട്ടത് ഹരജിക്കാര്‍ക്കു ആശ്വാസമാണ്. കേസില്‍ ജൂണ്‍ മൂന്നിനു വാദം പൂര്‍ത്തിയായിരുന്നുവെങ്കിലും വിധിപറയാനായി മാറ്റിവച്ചിരിക്കുകയായിരുന്നു.
കലാപത്തില്‍ മോദിയുള്‍പ്പടെയുള്ളവര്‍ നടത്തിയ ക്രിമിനല്‍ ഗൂഢാലോചനയെക്കുറിച്ച് അന്വേഷിക്കണമെന്നാവശ്യപ്പെട്ട് സാക്കിയ നേരത്തെ സുപ്രിം കോടതിയെ സമീപിച്ചിരുന്നു. ഇതേതുടര്‍ന്നാണ് മോദിയുള്‍പ്പെടെയുള്ളവരുടെ പങ്ക് അന്വേഷിക്കാന്‍ സുപ്രിം കോടതി സി.ബി.ഐ ഡയരക്ടര്‍ ആയിരുന്ന ആര്‍.കെ രാഘവന്റെ നേതൃത്വത്തില്‍ എസ്.ഐ.ടിയെ നിയോഗിച്ചത്. എന്നാല്‍ സംഭവം അന്വേഷിച്ച എസ്.ഐ.ടി കീഴ്‌ക്കോടതിയില്‍ കേസ് അവസാനിപ്പിച്ചതായി 2012 ഫെബ്രുവരിയില്‍ റിപ്പോര്‍ട്ട് നല്‍കി. എസ്.ഐ.ടിയുടെ ഈ നടപടി ചോദ്യംചെയ്താണ് സാക്കിയാ ജാഫ്രി ഹൈക്കോടതിയെ സമീപിച്ചത്.