മഡ്ഗാവ്: കിട്ടാക്കനിയായി നില്‍ക്കുന്ന കൗമാര കിരീടം തേടിയുള്ള ജര്‍മന്‍ പടയുടെ യാത്രയ്ക്ക് വിജയത്തുടക്കം. കളിയുടെ മക്കാല്‍ഭാഗവും പന്ത് കൈവശം വച്ചിട്ടും മികച്ച ഷോട്ടുകളുതിര്‍ത്തിട്ടും അവര്‍ പക്ഷേ വിജയത്തിലേക്ക് കടന്നുകൂടുകയായിരുന്നു. ഒന്നിനെതിരേ രണ്ട് ഗോളുകള്‍ക്ക് കോസ്റ്റ റിക്കയേയാണ് ജര്‍മനി വീഴ്ത്തിയത്.
ഈ ലോകകപ്പിന്റെ താരമാകുമെന്ന പ്രതീക്ഷിക്കപ്പെടുന്ന ജോണ്‍ ഫിറ്റെ ആര്‍പ് 21ാം മിനുട്ടില്‍ ജര്‍മനിയെ മുന്നില്‍ കടത്തി. എന്നാല്‍ പിന്നീട് 64ാം മിനുട്ടില്‍ ഗോമസിലൂടെ കോസ്റ്റ റിക്ക സമനില പിടിച്ചു. ഒടുവില്‍ കളി തീരാന്‍ നിമിഷങ്ങള്‍ മാത്രമുള്ളപ്പോള്‍ അവുകു നേടിയ നിര്‍ണായക ഗോളാണ് ജര്‍മനിക്ക് വിജയമൊരുക്കിയത്. മത്സരത്തില്‍ 25 ഷോട്ടുകളാണ് ജര്‍മനി ഗോള്‍ ലക്ഷ്യമിട്ട് പായിച്ചത്. ഗ്രൂപ്പിലെ രണ്ടാം മത്സരത്തില്‍ ജര്‍മനി ഇറാനുമായും കോസ്റ്റ റിക്ക ഗ്വിനിയയുമായും ഏറ്റുമുട്ടും.
വിജയത്തുടക്കമിട്ട്
ഇറാന്‍

ഗ്രൂപ്പ് സിയിലെ മറ്റൊരു മത്സരത്തില്‍ കരുത്തരായ ഇറാന്‍ ഗ്വിനിയയെ പരാജയപ്പെടുത്തി വിജയത്തുടക്കമിട്ടു. ഒന്നിനെതിരേ മൂന്ന് ഗോളുകള്‍ക്കാണ് ഇറാന്‍ വിജയം സ്വന്തമാക്കിയത്. ആദ്യ പകുതി ഗോള്‍രഹിതമായപ്പോള്‍ രണ്ടാം പകുതിയിലാണ് മത്സരത്തിലെ നാല് ഗോളുകളും പിറന്നത്. ഇറാന് വേണ്ടി അല്ലഹ്യര്‍ സയ്യദ്, മുഹമ്മദ് ഷരിഫി, സയ്യിദ് കരിമി എന്നിവരാണ് വല ചലിപ്പിച്ചത്. കളിയുടെ 59ാം മിനുട്ടിലാണ് ഗ്വിനിയ തീര്‍ത്ത പ്രതിരോധ കോട്ട പൊളിച്ച് സയ്യദ് വല ചലിപ്പിച്ചത്. 70ാം മിനുട്ടില്‍ ഇറാന് അനുകൂലമായി ലഭിച്ച പെനാല്‍റ്റി വലയിലെത്തിച്ച് ഷരിഫി ലീഡുയര്‍ത്തി. പിന്നീട് കളി തീരാന്‍ നിമിഷങ്ങള്‍ മാത്രമുള്ളപ്പോള്‍ കരിമി ഇറാന്റെ ലീഡ് മൂന്നാക്കി ഉയര്‍ത്തി വിജയം പൂര്‍ത്തിയാക്കി.
പിന്നാലെ ഗ്വിനിയയുടെ ആശ്വസ ഗോളും പിറന്നു. ഫന്‍ജെ ടൂറെയാണ് അവര്‍ക്ക് ഒരു ഗോള്‍ സമ്മാനിച്ചത്.