ന്യൂഡല്‍ഹി: പൂട്ടിയിട്ട കാറില്‍ ശ്വാസം കിട്ടാതെ രണ്ടു കുട്ടികള്‍ മരിച്ചു. സോനു (5), രാജ് (6) എന്നിവരാണ് മരിച്ചത്. ഇരുവരും ബന്ധുക്കളാണ്. കുട്ടികളെ കാണാനില്ലെന്ന് ചൂണ്ടിക്കാട്ടി ബന്ധുക്കള്‍ പൊലിസില്‍ പരാതി നല്‍കിയിരുന്നു. പൊലിസ് സഹായത്തോടെ പലയിടത്തായി അന്വേഷണം നടക്കുന്നതിനിടയിലാണ് കാറിനുള്ളില്‍ കുട്ടികളെ മരിച്ച നിലയില്‍ കണ്ടെത്തിയത്. മരിച്ച കുട്ടികളിലൊരാളുടെ പിതാവിന്റെ കാറിലാണ് ഇരുവരും കയറിയത്. വീട്ടില്‍ കാര്‍ കൊണ്ടുവന്നതിനു ശേഷം പിതാവ് കാര്‍ പൂട്ടിയിരുന്നില്ല. പിന്നീട് റിമോട്ട് ഉപയോഗിച്ച് വീട്ടിനുള്ളില്‍ നിന്നുതന്നെ കാര്‍ പൂട്ടി. ഇതിനിടയില്‍ കുട്ടികള്‍ കാറിനകത്ത് കയറിയത് ആരും കണ്ടിരുന്നില്ല. കുട്ടികളെ ആരെങ്കിലും തട്ടിക്കൊണ്ടുപോയതാകാമെന്ന രീതിയിലായിരുന്നു അന്വേഷണം നടന്നിരുന്നത്. കാറില്‍ അവശനിലയില്‍ കണ്ടെത്തിയ കുട്ടികളെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.