ചെന്നൈ: പഠനത്തില്‍ മോശമായതിനെ തുടര്‍ന്ന് സ്‌കൂളില്‍ നിന്ന് പുറത്താക്കിയതിന് അധ്യാപികയെ വിദ്യാര്‍ഥി കുത്തിപ്പരുക്കേല്‍പ്പിച്ചു. അധ്യാപിക ചെങ്കല്‍പേട് സ്വദേശിനി പൂങ്കുടി(28)ക്കാണ് കുത്തേറ്റത്. സംഭവത്തെ തുടര്‍ന്ന് 16 വയസുകാരനെ പോലിസ് പിടികൂടി. കാഞ്ചിപുരം ജില്ലയിലെ തിരുക്കഴുകൂണ്ടറിനടുത്തുള്ള സോഗണ്ടിയിലെ ലിറ്റില്‍ ജാക്കി മെട്രിക്കുലേഷന്‍ ഹയര്‍ സെക്കന്‍ഡറി സ്‌കൂളിലാണ് സംഭവം. ക്ലാസെടുക്കുന്നതിനിടയിലാണ് അധ്യാപികയെ വിദ്യാര്‍ഥി കത്തികൊണ്ട് കുത്തിയത്. സംഭവത്തെ തുടര്‍ന്ന് മറ്റ് വിദ്യാര്‍ഥികളുടെയും അധ്യാപകരുടെയും സഹായത്തോടെ കുട്ടിയെ പിടികൂടി പൊലിസിലേല്‍പ്പിക്കുകയായിരുന്നു.