ആഗ്ര: താജ്മഹല്‍ ശില്‍പ ചാതുരികൊണ്ട് മനം മയക്കുന്നതും ലോകാത്ഭുതവും മാത്രമല്ല, അത് ഒരുപാട് ജനങ്ങള്‍ക്ക് തൊഴില്‍ നല്‍കുന്നതുകൂടിയാണെന്ന് സമാജ് വാദി പാര്‍ട്ടി ദേശീയാധ്യക്ഷനും ഉത്തര്‍പ്രദേശ് മുന്‍മുഖ്യമന്ത്രിയുമായ അഖിലേഷ് യാദവ്.
അനശ്വര പ്രണയത്തിന്റെ സ്മാരകമെന്ന നിലയില്‍ ലക്ഷക്കണക്കിന് ആളുകളാണ് താജ്മഹല്‍ സന്ദര്‍ശിക്കാന്‍ എത്തുന്നത്. ഇന്നലെ പൗര്‍ണമിയില്‍ താജ്മഹല്‍ സന്ദര്‍ശിക്കാനായി ഭാര്യക്കും മക്കള്‍ക്കുമൊപ്പം ആഗ്രയില്‍ എത്തിയപ്പോഴാണ് മാധ്യമപ്രവര്‍ത്തകര്‍ക്ക് മുന്‍പില്‍ താജിനെക്കുറിച്ച് അദ്ദേഹം വാചാലനായത്.
ഉത്തര്‍പ്രദേശ് സര്‍ക്കാരിന്റെ വിനോദ സഞ്ചാര പട്ടികയില്‍ നിന്ന് താജിനെ ഒഴിവാക്കിയതിനെ അഖിലേഷ് രൂക്ഷമായി വിമര്‍ശിച്ചിരുന്നു. ഇതിനുപിന്നാലെയാണ് ഈ സ്മാരകം ഒട്ടേറെ പേര്‍ക്ക് ജോലി നല്‍കുന്നുണ്ടെന്നുകൂടി അദ്ദേഹം പ്രതികരിച്ചത്.
ശില്‍പചാതുരികൊണ്ട് ലോകത്തെ അത്ഭുതപ്പെടുത്തുന്നതാണ് ഇതെന്ന കാര്യത്തില്‍ സംശയമില്ല. ലോകത്തില്‍ ഇത്തരത്തില്‍ വലിയൊരു ചരിത്രമുള്ള സ്മാരകം വേറെയുണ്ടോയെന്നത് സംശയമാണെന്നും അഖിലേഷ് കൂട്ടിച്ചേര്‍ത്തു.