കണ്ണൂര്‍: വിവരാവകാശത്തിനും ഇ-ട്രഷറി വഴി പണമടക്കാനുള്ള സൗകര്യം സംസ്ഥാനത്ത് ഉടന്‍ നടപ്പിലാകും. ഇതിനുള്ള നടപടിക്രമങ്ങള്‍ ട്രഷറി വകുപ്പ് ആരംഭിച്ചു. ലോകത്തെവിടെയും ഇരുന്നു ഓണ്‍ലൈന്‍ വഴി നെറ്റ്ബാങ്ക് സൗകര്യത്തോടെ വിവരാവകാശ നിയമ പ്രകാരമുള്ള അപേക്ഷാ ഫീസ് അടക്കാവുന്ന സൗകര്യം ലഭിക്കുന്നതോടെ വിവരാവകാശ രംഗത്ത് വന്‍ മുന്നേറ്റമുണ്ടാകുമെന്നാണ് വിലയിരുത്തുന്നത്.
വിവരങ്ങള്‍ ഓണ്‍ലൈനില്‍ അപേക്ഷിക്കാനുള്ള സൗകര്യം വിവിധ വകുപ്പുകള്‍ ഏര്‍പ്പെടുത്തിയിട്ടുണ്ട്. എന്നാല്‍ ഇതിനുള്ള ഫീസ് അടക്കുന്നതിന് ഇ-പേമെന്റ് സംവിധാനം ഏര്‍പ്പെടുത്തിയിരുന്നില്ല.
ഇ-ട്രഷറി വഴി വിവരാവകാശ നിയമപ്രകാരമുള്ള പമണമടക്കുന്നതിനാവശ്യമായ സൗകര്യം ഏര്‍പ്പെടുത്തുന്നതിന് ഓഫിസ് സംബന്ധമായ പ്രാഥമിക വിവരരങ്ങള്‍ അതാത് വകുപ്പുകള്‍ ട്രഷറി വകുപ്പിന് അടിയന്തരമായി ലഭ്യമാക്കണമെന്നാവശ്യപ്പെട്ട് വകുപ്പ് മേധാവികള്‍ക്ക് ധനകാര്യ ജോയിന്റെ സെക്രട്ടറി ടി കാഞ്ചന സര്‍ക്കുലര്‍ അയച്ചിട്ടുണ്ട്. രണ്ടു മാസത്തിനകം വിവരങ്ങള്‍ ലഭ്യമാക്കണമെന്നാണ് ആവശ്യപ്പെട്ടിരിക്കുന്നത്.
സംസ്ഥാനത്ത് കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് ഇ-ട്രഷറി സംവിധാനം എല്ലാ വകുപ്പിലും നടപ്പിലാക്കിയെങ്കിലും വിവരാവകാശ പ്രകാരമുള്ള അപേക്ഷയ്ക്കുള്ള പണം ഇ-പേയ്‌മെന്റ് വഴി അടക്കാന്‍ കഴിയില്ലായിരുന്നു. ഇത് പരാതിക്കിടയാക്കിയിരുന്നു.
തുടര്‍ന്ന് ഇ-ട്രഷറി വഴി ഇടപാടു നടത്തുന്ന എല്ലാ വകുപ്പുകള്‍ക്കും വിവരാവകാശ നിയമപ്രകാരമുള്ള ഫീസടക്കുന്നതിനുള്ള ശീര്‍ഷകം കൂടി ഉള്‍പ്പെടുത്തുന്നതിനുള്ള സാങ്കേതിക തടസമൊന്നുമില്ലെന്ന് ട്രഷറി വകുപ്പ് ധനകാര്യ വകുപ്പിനെ അറിയിച്ചിരുന്നു. ഇതിനായി വിവരങ്ങള്‍ വിവിധ വകുപ്പുകള്‍ നല്‍കാനുള്ള ഉത്തരവ് സര്‍ക്കാര്‍ പുറപ്പെടുവിക്കണമെന്നും ട്രഷറി വകുപ്പ് ആവശ്യപ്പെട്ടിരുന്നു. ഇതിനെ തുടര്‍ന്നാണ് വിവരങ്ങള്‍ ഉടന്‍ നല്‍കാര്‍ സര്‍ക്കാര്‍ നിര്‍ദേശം നല്‍കിയിരിക്കുന്നത്.
സംസ്ഥാന പബ്ലിക് ഇന്‍ഫര്‍മേഷന്‍ ഓഫിസറുടെ പേരിലോ സംസ്ഥാന അസി.പബ്ലിക് ഇന്‍ഫര്‍മേഷന്‍ ഓഫിസറുടെ പേരിലോ മാറാവുന്ന 10 രൂപയുടെ ഡിമാന്റ് ഡ്രാഫ്റ്റ്, ബാങ്കേഴ്‌സ് ചെക്ക്, പേ ഓര്‍ഡര്‍ എന്നിവയോ കോര്‍ട്ട് ഫീസ് സ്റ്റാമ്പോ എസ്.ബി.ഐയുടെ ഏതെങ്കിലും ശാഖയില്‍ പണമടച്ച രസീതോ, സര്‍ക്കാര്‍ ട്രഷറികള്‍ വഴി നേരിട്ട് പണമടച്ച് രസീതോ ഉള്‍പ്പെടെ തപാല്‍ വഴിയാണ് ഇപ്പോള്‍ വിവരാവകാശ നിയമപ്രകാരമുള്ള ചോദ്യങ്ങള്‍ ചോദിക്കുന്നത്. ഇതല്ലെങ്കില്‍ പബ്ലിക് ഇന്‍ഫര്‍മേഷന്‍ ഓഫിസില്‍ നേരിട്ട് പണമടച്ചും അപേക്ഷ നല്‍കാം.
എന്നാല്‍ ഇ-ട്രഷറി വഴി വിവരാവാകാശ നിയമപ്രകാരമുള്ള ചോദ്യങ്ങള്‍ക്കുളള അപേക്ഷയുടെ ഫീസടക്കാന്‍ സൗകര്യമുണ്ടായാല്‍ കൂടുതല്‍ പേര്‍ വിവരാവകാശ നിയമം ഉപയോഗപ്പെടുത്തും. ഇത് കൂടുതല്‍ വിവരങ്ങള്‍ പുറത്തുവരാനും ഇടയാക്കും.
എന്‍.ഐ.സി നിര്‍മിച്ച സോഫ്റ്റ്‌വെയറിന്റെ സഹായത്തോടെയാണ് ഇ-ട്രഷറി സംവിധാനം സംസ്ഥാനത്ത് ഏര്‍പ്പെടുത്തിയത്. ഇതുവഴി നെറ്റ്ബാങ്ക് സൗകര്യത്തോടെ ഏതൊരാള്‍ക്കും ഏതു സമയത്തും സര്‍ക്കാര്‍ വകുപ്പുകളിലേക്ക് പണമടക്കാനാകും. ഇതിന്റെ ഗുണമാണ് ഇനി വിവരാവകാശത്തിലും ലഭിക്കാന്‍ പോകുന്നത്.