ഫറോക്ക്:  യുവാവ് പുഴയില്‍ കാണതായെന്ന അഭ്യൂഹത്തെ തുടര്‍ന്നു ചാലിയാറില്‍ തെരച്ചില്‍ നടത്തി.  കോഴിക്കോട് സൗത്ത് ബീച്ചില്‍ മാനൂറെയില്‍ സലീമിന്റെ മകന്‍ അബ്ദുല്‍ ഫഹദി(21)നെ കാണതായെന്ന പരാതിയെതുടര്‍ന്നാണ് ഫറോക്ക് പഴയ പാലത്തിനു സമീപത്തും പരിസരത്തും തെരച്ചില്‍ നടത്തിയത്.
വെളളിയാഴ്ച പുലര്‍ച്ചെ ഒന്നരയോടെ വീട്ടില്‍ നിന്നിറങ്ങിയ യുവാവ് ഇതിനു ശേഷം ഫറോക്ക് പാലത്തിനു സമീപത്തു നിന്നും വീട്ടിലേക്ക് ഫോണ്‍ വിളിച്ചിരുന്നു.
    ഇതിനെ തുടര്‍ന്നു വീട്ടുകാര്‍ പുലര്‍ച്ചെ തന്നെ പാലത്തിനു സമീപത്തു തെരച്ചില്‍ നടത്തിയെങ്കിലും ഫഹദിനെ കണ്ടെത്താനായില്ല. പകല്‍ പാലത്തോടു ചേര്‍ന്നുളള നടപ്പാതയില്‍ യുവാവിന്റെ ചെരുപ്പും പരിസരത്തു നിന്നു  ഇയാള്‍ ഓടിച്ച ഇരുചക്രവാഹനവും കണ്ടെത്തിയതാണ് പുഴയില്‍ ചാടിയെന്ന സംശയിത്തിനിടയാക്കിയത്.
കോഴിക്കോട് ടൗണ്‍ പൊലിസ് സ്‌റ്റേഷനില്‍ ബന്ധുക്കള്‍ യുവാവിനെ കാണതായതായി പരാതി നല്‍കി. കോസ്റ്റല്‍ പൊലീസും ഫയര്‍ഫോഴ്‌സും സംയുക്തമായി ചാലിയാറില്‍ ഏറെ നേരം തെരച്ചില്‍ നടത്തിയെങ്കിലും കണ്ടെത്താനായില്ല.