കോഴിക്കോട്: ട്രാന്‍സ്‌ജെന്‍ഡര്‍ മേഖലയിലെ അവകാശങ്ങള്‍ക്കായി പ്രവര്‍ത്തിക്കുന്ന ക്വിയര്‍ പ്രൈഡ് കേരളത്തിന്റെ ആഭിമുഖ്യത്തില്‍ കോഴിക്കോട്ട് ലൈംഗിക സ്വാഭിമാന ഘോഷയാത്ര നടത്തി.
 കടപ്പുറം മുതല്‍ ടാഗോര്‍ ഹാള്‍ വരെ നടന്ന ഘോഷയാത്രയില്‍ അഞ്ഞൂറോളം ഭിന്നലിംഗക്കാരും ആക്ടിവിസ്റ്റുകളും അണിനിരന്നു. ഘോഷയാത്ര ക്വിയര്‍ ആക്ടിവിസ്റ്റും സംഗീതജ്ഞയുമായ സുമതി മൂര്‍ത്തി ഫ്‌ളാഗ് ഓഫ് ചെയ്തു.
തുടര്‍ന്ന് ടാഗോര്‍ ഹാളില്‍ നടന്ന പൊതുസമ്മേളനം ട്രാന്‍സ്‌ജെന്‍ഡര്‍ ആക്ടിവിസ്റ്റ് ലക്ഷ്മി നാരായണ്‍ ത്രിപാഠി ഉദ്ഘാടനം ചെയ്തു.
സംഘടിത മാസികയുടെ പ്രൈഡ് പതിപ്പ് ഡോ. ഖദീജ മുംതാസ് പ്രകാശനം ചെയ്തു. ശരത് ചേലൂര്‍, ഡോ. ജിജോ കുര്യാക്കോസ്, രേഷ്മ ഭരദ്വാജ്, ശീതള്‍, കെ. അജിത, രേഖാരാജ്, കിഷോര്‍ കുമാര്‍ സംസാരിച്ചു.
ചിഞ്ചു അശ്വതി സ്വാഗതം പറഞ്ഞു. സ്വാഭിമാന ഘോഷയാത്രയുടെ ഭാഗമായി ഫോട്ടോ-ചിത്ര പ്രദര്‍ശനങ്ങള്‍, സെമിനാറുകള്‍, ഡോക്യുമെന്ററി പ്രദര്‍ശനം എന്നിവയും സംഘടിപ്പിച്ചു.