ലഖ്‌നൗ: ഉത്തര്‍പ്രദേശിലെ ഷാംലിയില്‍ വിഷവാതകം ശ്വസിച്ച 300 സ്‌കൂള്‍ കുട്ടികളെ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെയാണ് കുട്ടികള്‍ക്ക് അസ്വസ്ഥത അനുഭവപ്പെട്ടത്. ഉടന്‍ ആശുപത്രിയില്‍ എത്തിക്കുകയായിരുന്നു.
സരസ്വതി ശിശു മന്ദിരത്തിലെ കുട്ടികള്‍ക്കാണ് ശ്വാസ തടസം, ഛര്‍ദ്ദി, വയറുവേദന, തലകറക്കം, കണ്ണുകള്‍ ചുവക്കല്‍ എന്നിവ തുടങ്ങിയത്. സ്‌കൂളിനടുത്തുള്ള പഞ്ചസാര ഫാക്ടറിയില്‍ നിന്നുള്ള വിഷവാതകം ശ്വസിച്ചതാണ് പ്രശ്‌നത്തിന് കാരണം.
അസ്വസ്ഥത ബാധിച്ച കുട്ടികളില്‍ 35 പേരുടെ നില ഗുരുതരമാണെന്ന് ആശുപത്രി അധികൃതര്‍ അറിയിച്ചു. ഇവരെ മീററ്റിലെ ആശുപത്രിയിലേക്ക് മാറ്റിയിട്ടുണ്ട്.
പഞ്ചസാര ഫാക്ടറിയില്‍ നിന്ന് പുറന്തള്ളുന്ന മാലിന്യം സ്‌കൂളിനടുത്താണ് കൊണ്ടിടുന്നതെന്ന് സ്‌കൂള്‍ അധികൃതരും കുട്ടികളുടെ രക്ഷിതാക്കളും ആരോപിച്ചു.