പനാജി: കരുത്തരായ ജര്‍മനിയെ നാലുഗോളുകള്‍ക്ക് പരാജയപ്പെടുത്തി ഇറാന്‍ അണ്ടര്‍ 17 ലോകകപ്പിന്റെ പ്രീ ക്വാര്‍ട്ടറില്‍ പ്രവേശിച്ചു. മത്സരത്തിന്റെ തുടക്കം മുതല്‍ തന്നെ വ്യക്തമായ ആധിപത്യവുമായി കളിച്ച ഇറാന്‍ ആറാം മിനുട്ടില്‍ തന്നെ മുന്നിലെത്തി. യൂനസ് ഡെല്‍ഫിയാണ് ഇറാന് വേണ്ടി ഗോള്‍ നേടിയത്. ഇതോടെ സി ഗ്രൂപ്പില്‍ നിന്ന് ബ്രസീലിന്റെ കൂടെ ഇറാനും പ്രീ ക്വാര്‍ട്ടറില്‍ പ്രവേശിച്ചു. തുടക്കം മുതല്‍ തന്നെ അക്രമിച്ചു കളിച്ച ഇറാന്‍ ആദ്യ പകുതി അവസാനിക്കും മുന്‍പു രണ്ടാം ഗോളും നേടി ലീഡുയര്‍ത്തി. 42-ാം മിനുട്ടില്‍ ലഭിച്ച ഫ്രീകിക്കില്‍ നിന്നായിരുന്നു ഇറാന്റെയും ഡെല്‍ഫിയുടെയും രണ്ടാം ഗോള്‍.
ആദ്യ പകുതി അവസാനിക്കുന്നതിന് മുന്‍പെ ഗോള്‍ നേടുന്നതിനായി ഇറാന് നിരവധി അവസരങ്ങള്‍ ലഭിച്ചെങ്കിലും ലക്ഷ്യം കണ്ടില്ല. രണ്ടാം പകുതിക്ക് ശേഷം രണ്ട് മാറ്റവുമായി ഇറങ്ങിയ ജര്‍മനി മത്സരത്തിലേക്ക് തിരിച്ചു വരാന്‍ ശ്രമിച്ചെങ്കിലും ഇറാന്റെ പ്രതിരോധത്തില്‍ തട്ടി ജര്‍മന്‍ മുന്നേറ്റനിര വിയര്‍ത്തു. 49-ാം മിനുട്ടില്‍ ഇറാന് ലഭിച്ച കോര്‍ണര്‍ കിക്ക് അലഹ്‌യാന്‍ സയ്യിദ് ഹെഡറിലൂടെ നിഷ്പ്രയാസം വലയിലെത്തിച്ചു. സ്‌കോര്‍ 3-0. ഇതോടെ പൂര്‍ണമായും സമ്മര്‍ദത്തിലായ ജര്‍മനി ഒറ്റപ്പെട്ട മുന്നേറ്റങ്ങള്‍ മാത്രം നടത്തി.
കളം നിറഞ്ഞു കളിച്ച ഇറാന്റെ സയ്യിദിന് മികച്ച പല അവസരങ്ങളും ലഭിച്ചെങ്കിലും ഫിനിഷിങ് പോരായ്മ തിരിച്ചടിയായി. 75-ാം മിനുട്ടില്‍ വാഹിദ് നംദാരിയുടെ വകയായിരുന്നു ഇറാന്റെ നാലാം ഗോള്‍. ആശ്വാസ ഗോളിനായി ജര്‍മന്‍ താരങ്ങള്‍ ഉണര്‍ന്നു കളിച്ചെങ്കിലും ഇറാന്‍ ഗോള്‍കീപ്പര്‍ക്ക് മുന്നില്‍ എല്ലാ ശ്രമവും പാഴായി.