യൂറോപ്യന്‍ മേഖലയിലെ യോഗ്യതാ പോരാട്ടങ്ങളില്‍ ഫ്രാന്‍സ്, പോര്‍ച്ചുഗല്‍ ടീമുകള്‍ യോഗ്യത ഉറപ്പിച്ചു.
ബെലാറസിനെതിരേ അന്റോയിന്‍ ഗ്രിസ്മാന്‍, ഒലിവര്‍ ജിറൂദ് എന്നിവരുടെ ഗോളിലാണ് ഫ്രഞ്ച് പട ജയമുറപ്പിച്ചത്. ഗ്രൂപ്പ് എയില്‍ ഒന്നാം സ്ഥാനക്കാരായിട്ടാണ് ഫ്രാന്‍സ് യോഗ്യത നേടിയത്.
സ്വിറ്റ്‌സര്‍ലന്‍ഡിനെതിരേ ഡിജോറുവിന്റെ സെല്‍ഫ് ഗോളില്‍ ആദ്യ പകുതിയില്‍ മുന്നിലെത്താന്‍ പോര്‍ച്ചുഗലിന് സാധിച്ചു. 57ാം മിനുട്ടില്‍ ആന്‍ഡ്രെ സില്‍വയുടെ ഗോളിലാണ് ടീം ജയമുറപ്പിച്ചത്. അതേസമയം തോല്‍വിയോടെ സ്വിറ്റ്‌സര്‍ലന്‍ഡ് ടീം പ്ലേ ഓഫ് കളിക്കേണ്ടി വരും.
ഹോളണ്ട് നിര്‍ണായക പോരാട്ടത്തില്‍ സ്വീഡനെ എതിരില്ലാത്ത രണ്ട് ഗോളിന് വീഴ്ത്തിയെങ്കിലും ഗോള്‍ശരാശരിയിലെ കുറവ് അവര്‍ക്ക് യോഗ്യത നിഷേധിച്ചു. ആര്യന്‍ റോബന്‍ ഇരട്ട ഗോളുകളുമായി തിളങ്ങി. മത്സരത്തില്‍ ഏഴ് ഗോളിനെങ്കിലും ജയിച്ചിരുന്നെങ്കില്‍ മാത്രമേ ഹോളണ്ടിന് സാധ്യതയുണ്ടായിരുന്നുള്ളൂ. 2002ന് ശേഷം ആദ്യമായിട്ടാണ് ഓറഞ്ച് പടയ്ക്ക് ലോകകപ്പ് യോഗ്യത നഷ്ടമാകുന്നത്.