ന്യൂഡല്‍ഹി: കേരളത്തിന്റെ സാംസ്‌കാരിക പൈതൃകം വിളിച്ചോതുന്ന ഉത്സവമേളയ്ക്ക് രാജ്യതലസ്ഥാനത്ത് നാളെ തുടക്കം.
സംസ്ഥാനത്തിന്റെ സാംസ്‌കാരിക പൈതൃക പാരമ്പര്യത്തെക്കുറിച്ച് ഇതര സംസ്ഥാനങ്ങളിലെ ജനങ്ങള്‍ക്കിടയില്‍ പ്രചാരണം നടത്തുക എന്ന ലക്ഷ്യത്തോടെയാണ് സര്‍ക്കാര്‍ പരിപാടി ആവിഷ്‌കരിച്ചതെന്ന് സാംസ്‌കാരിക വകുപ്പ് അഡീഷണല്‍ സെക്രട്ടറി കെ. ഗീത പറഞ്ഞു. കഴിഞ്ഞവര്‍ഷം ഹൈദരാബാദില്‍ പരിപാടി നടത്തിയിരുന്നു. ഇനി ഡല്‍ഹി സര്‍ക്കാരിന്റെ സാംസ്‌കാരിക വിനിമയ പരിപാടി അടുത്ത ജനുവരിയില്‍ കേരളത്തില്‍ നടത്താന്‍ ധാരണയായിട്ടുണ്ടെന്ന് അഡീഷണല്‍ സെക്രട്ടറി പറഞ്ഞു.
നാളെ വൈകിട്ട് കോണാട്ട് പ്‌ളേസിലെ സെന്‍ട്രല്‍ പാര്‍ക്കില്‍ മുഖ്യമന്ത്രി പിണറായി വിജയനും ഡല്‍ഹി മുഖ്യമന്ത്രി അരവിന്ദ് കെജ്്‌രിവാളും തിരിതെളിക്കും. സംസ്ഥാന സാംസ്‌കാരിക വകുപ്പ് മന്ത്രി എ.കെ ബാലന്‍ അധ്യക്ഷനായിരിക്കും. ഡല്‍ഹി ഉപമുഖ്യന്ത്രി മനീഷ് സിസോദിയ, രാജ്യസഭാ ഡെപ്യൂട്ടി ചെയര്‍പേഴ്‌സണ്‍ പി.ജെ കുര്യന്‍, മീനാക്ഷി ലേഖി എം.പി, കേരള ഹൗസ് റെസിഡന്റ്‌സ് കമ്മിഷണര്‍ ഡോ.വിശ്വാസ് മേത്ത, സംസ്ഥാന സാംസ്‌കാരിക വകുപ്പ് സെക്രട്ടറി റാണി ജോര്‍ജ് പങ്കെടുക്കും.
രാവിലെ ഒന്‍പതിന് പുരാവസ്തു വകുപ്പ്, പുരാരേഖ വകുപ്പ്, മ്യൂസിയം വകുപ്പ്, ബുക്ക് മാര്‍ക്കറ്റിങ് സൊസൈറ്റി, കേരള ലളിതകലാ അക്കാദമി, ആറന്‍മുള വാസ്തുവിദ്യാ ഗുരുകുലം എന്നിവ ചേര്‍ന്നു നടത്തുന്ന പ്രദര്‍ശനത്തിന്റെ ഉദ്ഘാടനം കേരള ഹൗസില്‍ മന്ത്രി കടന്നപ്പള്ളി രാമചന്ദ്രന്‍ നിര്‍വഹിക്കും. മലയാള സിനിമാ ചരിത്രത്തിലേക്ക് വെളിച്ചം വീശുന്ന സിനിമകളുടെ പ്രദര്‍ശനമാണ് പരിപാടിയിലെ ആകര്‍ഷകമായ മറ്റൊരിനം. കേരളത്തിലെ പ്രമുഖ ആദിവാസി കലാകാരന്‍മാര്‍ അവതരിപ്പിക്കുന്ന പരിപാടികള്‍ ഉള്‍പ്പെടെ വിവിധ രംഗങ്ങളില്‍ നിന്നുള്ള മുന്നൂറോളം പേര്‍ പരിപാടികള്‍ അവതരിപ്പിക്കുമെന്ന് ഫെസ്റ്റിവല്‍ ഡയരക്ടര്‍ പ്രമോദ് പയ്യന്നൂര്‍ പറഞ്ഞു.
15ന് കേരള ഹൗസില്‍ സാംസ്‌കാരിക അന്യോന്യം നടക്കും. മുന്‍ മന്ത്രി എം.എ ബേബി മോഡറേറ്ററായിരിക്കും. സുപ്രിം കോടതി ജഡ്ജി ജസ്റ്റിസ് കുര്യന്‍ ജോസഫ്, മുന്‍ മന്ത്രി ബിനോയ് വിശ്വം, സാഹിത്യകാരന്‍മാരായ കെ. സച്ചിദാനന്ദന്‍, ആനന്ദ്, സക്കറിയ, സി. രാധാകൃഷ്ണന്‍ പങ്കെടുക്കും. വൈകിട്ട് ആറരയ്ക്ക് വിവിധ രംഗങ്ങളില്‍ വ്യക്തിമുദ്ര പതിപ്പിച്ച പ്രമുഖരെ ആദരിക്കും.
കേന്ദ്ര ടൂറിസം മന്ത്രി അല്‍ഫോണ്‍സ് കണ്ണന്താനം ഉദ്ഘാടനം ചെയ്യും. 16ന് നടക്കുന്ന സമാപന പരിപാടിയില്‍ മന്ത്രി എ.കെ ബാലന്റെ അധ്യക്ഷതയില്‍ ഡല്‍ഹി ഉപമുഖ്യമന്ത്രി മനീഷ് സിസോദിയ ഉദ്ഘാടനം ചെയ്യും.
മന്ത്രി രാമചന്ദ്രന്‍ കടന്നപ്പളളി, എം.പിമാരായ സുരേഷ്‌ഗോപി, പി. കരുണാകരന്‍, പി.കെ. കുഞ്ഞാലിക്കുട്ടി പങ്കെടുക്കും.