സുല്‍ത്താന്‍ബത്തേരി: ഉന്നത പൊലിസുദ്യോഗസ്ഥരില്‍ സ്വാധീനമുണ്ടെന്നും കള്ളക്കേസില്‍ കുടുക്കുമെന്നും ഭീഷണിപ്പെടുത്തി പണംതട്ടിയ യുവാവിനെ അറസ്റ്റ് ചെയ്തു. പാലക്കാട് സ്വദേശി അരിവയല്‍ മുസ്തഫ (38)യാണ് സുല്‍ത്താന്‍ ബത്തേരി പൊലിസിന്റെ പിടിയിലായത്. മലപ്പുറം സ്വദേശിയും ബീനാച്ചിയിലെ താമസക്കാരനുമായ നൗഫലിന്റെ പരാതിയിലാണ് എസ്.ഐ എന്‍ അജീഷ് കുമാറും സംഘവും ഇയാളെ അറസ്റ്റ് ചെയ്തത്. നൗഫലിന്റെ കാര്‍ വാടകക്കെടുത്ത മറ്റൊരാള്‍ നൗഫലറിയാതെ കല്‍പ്പറ്റയിലെ ഒരു വ്യക്തിക്ക് പണയം വച്ചിരുന്നു. ഈ സംഭവത്തില്‍ നൗഫല്‍ പൊലിസില്‍ പരാതി നല്‍കിയിരുന്നു. ഇതിനിടെ തനിക്ക് ഉന്നത പൊലിസ് അധികാരികളുമായി ബന്ധമുണ്ടെന്നും കാര്‍ വീണ്ടെടുത്ത് തരാമെന്നും പറഞ്ഞ് മുസ്തഫ നൗഫലിനൊപ്പം കൂടി. കേസ് ഒത്തുതീര്‍പ്പാക്കി കാര്‍ വീണ്ടെടുത്തതോടെ നൗഫലിനോട് 50,000രൂപ മുസ്തഫ ആവശ്യപ്പെട്ടു. കേസ് ഒത്തുതീര്‍പ്പാക്കിയ വകയില്‍ പൊലിസുകാര്‍ക്ക് നല്‍കാനാണെന്ന വ്യാജേനയാണ് ഇയാള്‍ തുക ആവശ്യപ്പെട്ടത്. തുക നല്‍കിയില്ലെങ്കില്‍ സ്വാധീനം ഉപയോഗിച്ച് നൗഫലിനെ കള്ളക്കേസില്‍ കുടുക്കുമെന്നും ഭീഷണിപ്പെടുത്തി. കഴിഞ്ഞമാസം രണ്ടു തവണകളിലായി 34,000 രൂപയാണ് നൗഫലിനെ ഭീഷണിപ്പെടുത്തി ഇയാള്‍ തട്ടിയെടുത്തത്. ഇയാളുടെ ഭീഷണി തുടര്‍ന്നതോടെയാണ് നൗഫല്‍ പരാതി നല്‍കിയത്. ബത്തേരിയിലെ ഭാര്യ വീട്ടില്‍ താമസിച്ചാണ് പ്രതി തട്ടിപ്പ് നടത്തിവന്നിരുന്നത്. സമാനമായ രീതിയില്‍ ഉന്നതബന്ധമുണ്ടെന്ന വ്യാജേന നിരവധിപേരെ കബളിപ്പിച്ചും ഭീഷണിപ്പെടുത്തിയും ഇയാള്‍ പണം തട്ടിയിട്ടുണ്ടെന്ന് പൊലിസ് പറഞ്ഞു. അയല്‍ ജില്ലകളിലുള്‍പ്പെടെ ഇയാള്‍ക്കെതിരേ കേസുണ്ട്. ബത്തേരി ജെ.സി.എം(ഒന്ന്) കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.