കോഴിക്കോട് : സര്‍വിസിലുള്ള മുഴുവന്‍ അധ്യാപകരെയും കെടെറ്റ് യോഗ്യതയില്‍ നിന്നും ഒഴിവാക്കണമെന്നും നിയമിക്കപ്പെട്ട അധ്യാപകര്‍ക്ക് നിയമനാംഗീകാരവും ശമ്പളവും നല്‍കണമെന്നും ആവശ്യപ്പെട്ട് ഒക്ടോബര്‍ 25 ന് ബുധനാഴ്ച സംസ്ഥാനത്തെ ഡി.ഡി.ഇ ഓഫിസുകള്‍ക്ക് മുന്നില്‍ മാര്‍ച്ചും ധര്‍ണയും നടത്തുന്നതിന് കെ.എസ്.ടി.യു സംസ്ഥാന കമ്മിറ്റി തീരുമാനിച്ചു. യോഗത്തില്‍ പ്രസിഡന്റ് സി.പി ചെറിയ മുഹമ്മദ് അധ്യക്ഷനായി.
2016 ജൂണ്‍ മുതല്‍ നിയമിക്കപ്പെട്ട അധ്യാപകര്‍ക്ക് നിയമനാംഗീകാരവും ശമ്പളവും നല്‍കാന്‍ സര്‍ക്കാര്‍ ഒരു നടപടിയും സ്വീകരിച്ചില്ല. ധൃതി പിടിച്ച് ഒരാലോചനയുമില്ലാതെ കേരള വിദ്യാഭ്യാസ ചട്ടം ഭേദഗതി ചെയ്തതും പ്രതിസന്ധി സൃഷ്ടിച്ചിരിക്കയാണെന്ന് യോഗം ചൂണ്ടിക്കാട്ടി.
ജനറല്‍ സെക്രട്ടറി എ.കെ സൈനുദ്ദീന്‍, ഭാരവാഹികളായ അബ്ദുല്ല വാവൂര്‍, പി.കെ. ഹംസ, എന്‍.എ ഇസ്മാഈല്‍, പി. കെ. അസീസ്, എം.പി.കെ അഹമ്മദ് കുട്ടി, സിദ്ദീഖ് കൂടത്തില്‍, പി.പി മുഹമ്മദ്, കെ.എം.എ നാസര്‍, കെ. എം. അബ്ദുല്ല, മജീദ് കാടേങ്ങല്‍, സി.എം അലി, നാസര്‍ മുണ്ടക്കയം, ഐ ഹുസൈന്‍ പ്രസംഗിച്ചു.