കാളികാവ്: പത്താമത് സംസ്ഥാന വാഫി - വഫിയ്യ കലോത്സവത്തിന് കാളികാവില്‍ തിരിതെളിഞ്ഞു. ആദ്യ സെഷനായ ജീറാന്‍ അസംബ്ലി പാണക്കാട് സയ്യിദ് സാബിഖലി ശിഹാബ് തങ്ങള്‍ ഉദ്ഘാടനം ചെയ്തു.
സമീപ പ്രദേശത്തെ ഇരുനൂറ് മഹല്ലുകളുടെ കൂട്ടായ്മയാണ് വാഫി ജീറാന്‍ കമ്മിറ്റി. സംഗമത്തില്‍ സമസ്ത കേന്ദ്ര മുശാവറ അംഗം ഒ. കുട്ടി മുസ്‌ലിയാര്‍ അമ്പലക്കടവ് പ്രാര്‍ഥന നിര്‍വഹിച്ചു. പ്രസിഡന്റ് പി. കുഞ്ഞാണി മുസ്‌ലിയാര്‍ അധ്യക്ഷനായി.
ജീറാന്‍ കമ്മിറ്റി വര്‍ക്കിങ് സെക്രട്ടറി നൗഫല്‍ റഊഫ് വാഫി പ്രവര്‍ത്തന റിപ്പോര്‍ട്ട് അവതരിപ്പിച്ചു. തുടര്‍ന്ന് മജ്‌ലിസുന്നൂര്‍ പ്രാര്‍ഥനാ സംഗമത്തിന് അബ്ദുല്‍ അസീസ് മുസ്‌ലിയാര്‍ മൂത്തേടം നേതൃത്വം നല്‍കി. രാത്രി ഏഴിന് വാഫി ഫെസ്റ്റിന്റെ ആദ്യ മത്സരമായ അറബി അക്ഷരശ്ലോക മത്സരം നടന്നു.
ഇന്ന് രാവിലെ 10.30ന് കലോത്സവത്തിന്റെ ഉദ്ഘാടനം പാണക്കാട് സയ്യിദ് സാദിഖലി ശിഹാബ് തങ്ങള്‍ നിര്‍വഹിക്കും. എസ്.കെ.എസ്.എസ്.എഫ് സെക്രട്ടറി സത്താര്‍ പന്തലൂര്‍, ആര്യാടന്‍ ഷൗക്കത്ത്, ഒ.എം കരുവാരക്കുണ്ട് , ജി.സി കാരക്കല്‍, അബ്ദുസ്സലാം ഫൈസി ഇരിങ്ങാട്ടിരി, രാജന്‍ കരുവാരക്കുണ്ട്, അബ്ദുല്ല കെ.വി.കെ, ആസാദ് വണ്ടൂര്‍, നൗഷാദ് പൂഞ്ച എന്നിവര്‍ കലാവിചാരങ്ങള്‍ അവതരിപ്പിക്കും. ഫരീദ് റഹ്മാനി കാളികാവ് മോഡറേറ്ററാവും. തുടര്‍ന്ന് വിവിധ വേദികളിലായി മത്സരങ്ങള്‍ നടക്കും.
വാഫി ഫെസ്റ്റിനോടനുബന്ധിച്ച് ക്യൂ ഫോര്‍ ടുമാറോ, അര്‍ഹാം അസംബ്ലി, ഫിഖ്ഹ് സെമിനാര്‍, ഫൗണ്ടേഴ്‌സ് മീറ്റ്, കാംപസ് സമര്‍പ്പണം എന്നിവ നാളെ നടക്കും. ഞായറാഴ്ച വൈകിട്ട് ഏഴിന് വാഫി പി.ജി കാംപസ് സമര്‍പ്പണം പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും. 17ന് വഫിയ്യ കലോത്സവവും നടക്കും.