ന്യൂഡല്‍ഹി: കാണാതായ ജെ.എന്‍.യു വിദ്യാര്‍ത്ഥി നജീബ് അഹമ്മദ് കേസ് അന്വേഷിക്കുന്ന സി.ബി.ഐക്കെതിരെ രൂക്ഷവിമര്‍ശനവുമായി ഡല്‍ഹി ഹൈക്കോടതി. കേസ് അന്വേഷിക്കുന്നതില്‍ സി.ബി.ഐക്ക് താല്‍പര്യം നഷ്ടപ്പെട്ടെന്ന് കോടതി കുറ്റപ്പെടുത്തി. കേസില്‍ സി.ബി.ഐ ഇതുവരെ ഒന്നും കണ്ടെത്തിയിട്ടില്ലെന്നും കോടതി ചൂണ്ടിക്കാട്ടി.

ജസ്റ്റിസുമാരായ ജി.എസ് സിസ്താനി ചന്ദ്രശേഖര്‍ എന്നിവരടങ്ങിയ ബെഞ്ചിന്റേതാണ് വിമര്‍ശനം. കേസിലെ പ്രതികളെന്ന സംശയിക്കുന്ന വിദ്യാര്‍ഥികളുടെ ഫോണ്‍ വിളികളും മെസേജുകളും സംബന്ധിച്ച് സി.ബി.ഐ കോടതിയില്‍ ബോധിപ്പിച്ച കാര്യങ്ങളും സ്റ്റാറ്റസ് റിപ്പോര്‍ട്ടും തമ്മിലുള്ള വൈരുദ്ധ്യങ്ങള്‍ ചൂണ്ടിക്കാട്ടിയാണ് വിര്‍ശിച്ചത്.

അന്വേഷണം ഏറ്റെടുത്ത് പുരോഗതി അറിയിക്കത്തതിന് സി.ബി.ഐയെ കോടതി നേരത്തെയും വിമര്‍ശിച്ചിരുന്നു. തമാശ കളിക്കാനല്ല കേസ് കൈമാറിയതെന്നും കോടതി അന്ന് താക്കീത് ചെയ്തിരുന്നു.

അഞ്ചുമാസം മുമ്പാണ് കോടതി അന്വേഷണം സി.ബി.ഐയെ ഏല്‍പിച്ചത്. ഡല്‍ഹി പൊലിസിന്റെ അന്വേഷണം മന്ദഗതിയിലായതിനെ തുടര്‍ന്നായിരുന്നു നടപടി.
നജീബ് അഹമ്മദിനെ കാണാതായിട്ട് ഒക്ടോബര്‍ 15ന് ഒരു വര്‍ഷം പിന്നിട്ടിരുന്നു.