റിയാദ്: യമന്‍ സര്‍ക്കാരിന് വേണ്ടി യുദ്ധത്തിലേര്‍പ്പെട്ട സഖ്യ സേനയുടെ ഹെലികോപ്റ്റര്‍ അപകടത്തില്‍ രണ്ടു യു.എ.ഇ പൈലറ്റുമാര്‍ കൊല്ലപ്പെട്ടു. ഇന്നലെ വൈകീട്ട് സാങ്കേതിക തകരാര്‍ മൂലം ഹെലികൊപ്റ്റര്‍ അപകടത്തില്‍ പെടുകയായിരുന്നുവെന്നു സഖ്യ സേന വ്യക്തമാക്കി. സഖ്യ സേനയെ ഉദ്ധരിച്ചു യു.എ.ഇ ഔദ്യോഗിക ഏജന്‍സി വാം സ്ഥിരീകരിച്ചിട്ടുണ്ട്.

യമനില്‍ സാധാരണ നിരീക്ഷണ പറക്കലിനിടെയാണ് സാങ്കേതിക തകരാര്‍ കണ്ടെത്തിയത്. നിയന്ത്രണം നഷ്ട്ടപ്പെടുമെന്ന ഘട്ടത്തില്‍ അടിയന്തിര ലാന്‍ഡിങ് നടത്തുന്നതിനിടെ് അപകടമുണ്ടാവുകയായിരുന്നു.

മേജര്‍ പൈലറ്റ് അലി സഈദ് സൈഫ് അല്‍ മിസ്മരി, പൈലറ്റ് ബദര്‍ യഹ്‌യ മുഹമ്മദ് അല്‍ മര്‍ശദി എന്നിവരാണ് കൊല്ലപ്പെട്ടത്. നേരത്തെയും യമനില്‍ പല തവണയായുള്ള ഹെലികോപ്റ്റര്‍ അപകടത്തില്‍ യു.എ.ഇ സൈനികര്‍ കൊല്ലപ്പെട്ടിരുന്നു.