മക്ക: ഹജ് ഉംറ സീസണുകളില്‍ മക്കയിലെ ടാക്‌സി മേഖലയില്‍ നിന്നും വിദേശികള പൂര്‍ണ്ണമായും ഒഴിവാക്കി സഊദികള്‍ക്ക് മാത്രമായി പരിമിതപ്പെടുത്തണമെന്ന് മക്ക ആക്ടിംഗ് ഗവര്‍ണര്‍ അബ്ദുള്ള ബിന്‍ ബന്ദര്‍ രാജകുമാരന്‍ നിര്‍ദേശിച്ചു. മക്ക പ്രവിശ്യയിലെ സഊദി വല്‍ക്കരണ പദ്ധതി ഉദ്ഘാഘാടന പ്രഖ്യാപനത്തിലാണ് അദ്ദേഹം ഇക്കാര്യം പ്രഖ്യാപിച്ചത്.

ഓരോ പ്രവിശ്യയിലെയും തൊഴില്‍ വിപണിയിലെ മേഖലകള്‍ പരിശോധിച്ച് ആവശ്യമായ മേഖലയില്‍ സ്വദേശിവല്‍ക്കരണം പ്രഖ്യാപിക്കാന്‍ സഊദി ആഭ്യന്തര, തൊഴില്‍, മുനിസിപ്പല്‍, വാണിജ്യ, മന്ത്രാലയങ്ങള്‍ അംഗീകരിച്ചിട്ടുണ്ട്. ഇതിന്റെ ഭാഗമാണ് മക്ക പ്രവിശ്യയിലും അനുയോജ്യമായ മേഖലകള്‍ നിര്‍ണയിച്ച് സഊദി വല്‍ക്കരണം നടത്തുന്നത്. നിലവില്‍ രാജ്യത്ത് രണ്ടു ലക്ഷത്തിലേറെ സഊദികള്‍ ടാക്‌സി. മേഖലയില്‍ ഫുള്‍ ടൈം, പാര്‍ടൈം ആയി ജോലിയെടുക്കുന്നുവെന്നാണ് കണക്കുകള്‍.

അതേസമയം, രാജ്യത്തെ തുറമുഖ ജോലികളില്‍ സ്വദേശിവത്കരണം നടപ്പാക്കുമെന്ന് ഗതാഗത മന്ത്രി ഡോ. നബീല്‍ അല്‍ ആമൂദി വ്യക്തമാക്കി. തുറമുഖങ്ങളിലെ ഓഫീസ് ജോലികള്‍ക്ക് പുറമെ ഓപറേഷന്‍, സാങ്കേതികവിദ്യ, മറൈന്‍ എന്നിവയില്‍ കൂടി സ്വദേശികള്‍ക്ക് സംവരണം ഏര്‍പ്പെടുത്താനാണ് നീക്കം. സ്വദേശിവത്കരണം കൂടുതല്‍ മേഖലയിലേക്ക് വ്യാപിപ്പിക്കുന്നതിന്റെ ഭാഗമായാണ് നടപടി.

ഈ മേഖലയില്‍ പതിനായിരങ്ങളാണ് ജോലി ചെയ്യുന്നത്. രാഷ്ട്രത്തിന് വരുമാനമുണ്ടാക്കുന്നതിലും തൊഴിലവസരം സൃഷ്ടിക്കുന്നതിലും തുറമുഖങ്ങള്‍ക്ക് മുഖ്യ പങ്കുവഹിക്കാനാവുമെന്ന് തുറമുഖ മേല്‍നോട്ട ഉത്തരവാദിത്തം കൂടി വഹിക്കുന്ന ഗതാഗത മന്ത്രി പറഞ്ഞു.