തൃപ്പൂണിത്തുറ: ബൈക്കിലെത്തി സിനിമ - സീരിയല്‍ നടിയുടെ മാല പൊട്ടിക്കാന്‍ ശ്രമിച്ച യുവാവിനെ തൃപ്പൂണിത്തുറ പൊലിസ് അറസ്റ്റ് ചെയ്തു.
കുരീക്കാട് പ്ലാമൂട്ടില്‍ ബിജോയ് ജോളി (22)യെയാണ് എസ്.ഐ പി ശിവകുമാര്‍ അറസ്റ്റ് ചെയ്തത്. കഴിഞ്ഞ ഒമ്പതിന് ഉച്ചയ്ക്ക് രണ്ടിന് വൈക്കം റോഡില്‍ ചുരക്കാട് ചെട്ടിപറമ്പില്‍ റോഡിലായിരുന്നു സംഭവം.
ചൂരക്കാട് താമസിക്കുന്ന സിനിമ - സീരിയല്‍ നടി ഹരിപ്രിയയുടെ മാലയാണ് കവര്‍ച്ച ചെയ്യാന്‍ ശ്രമിച്ചത്.
യുവതി ബഹളം വെച്ചപ്പോള്‍ ഇയാള്‍ ബൈക്കില്‍ കടന്നുകളഞ്ഞു. സംഭവം സമീപത്തെ കടയുടെ സി.സി.ടി.വിയില്‍ പതിഞ്ഞിരുന്നു.
പ്രതിയുടെ ചിത്രവും പൊലിസിന് ലഭിച്ചു. നഗരത്തിലെ ഓട്ടോ ഡ്രൈവര്‍മാര്‍ക്ക് പൊലിസ് സംഭവത്തെക്കുറിച്ച് വിവരം നല്‍കിയിരുന്നു. ഉദയംപേരൂരില്‍ വെച്ച് പ്രതിയെ കണ്ടതായി ഒരു ഓട്ടോ ഡ്രൈവര്‍ പൊലിസിനെ അറിയിച്ചുവെങ്കിലും പിടികൂടാന്‍ കഴിഞ്ഞില്ല.
പിറ്റേദിവസം ചോറ്റാനിക്കരയില്‍ വച്ച് പൊലിസ് പ്രതിയെ അറസ്റ്റ് ചെയ്തു. തൃപ്പൂണിത്തുറ ഹില്‍പാലസ് പൊലിസ് സ്റ്റേഷനില്‍ ബൈക്ക് മോഷണ കേസില്‍ പ്രതിയാണ് ബിജോയ് എന്ന് പൊലിസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.