ന്യൂഡല്‍ഹി: പാര്‍ട്ടി വിരുദ്ധപ്രവര്‍ത്തനം ആരോപിച്ച് രാജ്യസഭാംഗത്വം റദ്ദാക്കണമെന്ന ജെ.ഡി.യു നിതീഷ് കുമാര്‍ വിഭാഗത്തിന്റെ ആവശ്യം പരിഗണിച്ച് മുതിര്‍ന്ന നേതാക്കളായ ശരത് യാദവിനെയും അലി അന്‍വര്‍ അന്‍സാരിയെയും രാജ്യസഭാ സെക്രട്ടേറിയറ്റ് വിളിപ്പിച്ചു.
ശരത് യാദവിന്റെയും അലി അന്‍വറിന്റെയും രാജ്യസഭാംഗത്വം അസാധുവാക്കണമെന്നാവശ്യപ്പെട്ട് ജെ.ഡി.യു നേതാവും ബിഹാര്‍ മുഖ്യമന്ത്രിയുമായ നിതീഷ് കുമാര്‍ രാജ്യസഭാ സെക്രട്ടേറിയറ്റിന് കത്തയച്ചതിന്റെ അടിസ്ഥാനത്തിലാണ് നടപടി. ഇരുവരോടും ഈ മാസം 30ന് രാജ്യസഭാ അധ്യക്ഷന്‍ എം. വെങ്കയ്യ നായിഡു മുന്‍പാകെ ഹാജരാകണമെന്ന് നോട്ടിസില്‍ ആവശ്യപ്പെട്ടു.
ജൂലൈയില്‍ ബിഹാറില്‍ ബി.ജെ.പിയുമായി കൂട്ടുചേര്‍ന്നു ഭരണംപങ്കിട്ട നിതീഷ് കുമാറിന്റെ നടപടിയില്‍ പ്രതിഷേധിച്ചാണ് ഇരുവരും പാര്‍ട്ടിയോട് അകന്നത്. പിന്നാലെ നിതീഷിന്റെ വിലക്ക് ലംഘിച്ച് കഴിഞ്ഞമാസം ഡല്‍ഹിയില്‍ ചേര്‍ന്ന വിമത ദേശീയകൗണ്‍സിലിലും ബിഹാറില്‍ ആര്‍.ജെ.ഡി നേതാവ് ലാലുപ്രസാദ് യാദവ് സംഘടിപ്പിച്ച സമ്മേളനത്തിലും ഇരുവരും പങ്കെടുത്തതാണ് മുതിര്‍ന്ന നേതാക്കള്‍ക്കെതിരേ നടപടി സ്വീകരിക്കാന്‍ പാര്‍ട്ടിയെ പ്രേരിപ്പിച്ചത്. തമിഴ്‌നാട് നിയമസഭയില്‍ കൂറുമാറിയ 18 അണ്ണാ ഡി.എം.കെ എം.എല്‍.എമാരെ സ്പീക്കര്‍ അയോഗ്യരാക്കിയതുപോലെ ശരത് യാദവിനെയും അന്‍വറിനെയും അയോഗ്യരാക്കണമെന്നാണ് ജെ.ഡി.യു ആവശ്യം. അലി അന്‍വറിന്റെ കാലാവധി അടുത്തവര്‍ഷം അവസാനിക്കുമെങ്കിലും യാദവിന്റെ കാലാവധി 2022ലേ അവസാനിക്കൂ.
നിതീഷ് വിരുദ്ധ പക്ഷത്ത് നിലയുറപ്പിക്കുകയും വിമതയോഗങ്ങളില്‍ സജീവമായി പങ്കെടുക്കുകയും ചെയ്ത പാര്‍ട്ടി എം.പിയും കേരളാ ഘടകം അധ്യക്ഷനുമായ എം.പി വീരേന്ദ്രകുമാറിനെതിരേ നടപടിയെടുക്കുന്നതിനെ കുറിച്ച് ഔദ്യോഗികവിഭാഗം തീരുമാനമെടുത്തിട്ടില്ല.