ഷാര്‍ജ: ശ്രീലങ്കയ്‌ക്കെതിരായ ഏകദിന പരമ്പരയിലെ നാലാം മത്സരത്തിലും പാകിസ്താന് ജയം. ശ്രീലങ്ക ഉയര്‍ത്തിയ 174 റണ്‍സ് വിജയ ലക്ഷ്യം 11 ഓവര്‍ ശേഷിക്കെ മൂന്ന് വിക്കറ്റ് നഷ്ടത്തില്‍ മറികടക്കുകയായിരുന്നു പാകിസ്താന്‍.
ബാബര്‍ അസം (69*) ഷോയിബ് മാലിക് (69*) എന്നിവര്‍ പുറത്താകാതെ നേടിയ അര്‍ധ സെഞ്ച്വറികളാണ് പാകിസ്താന്റെ ജയം അനായാസമാക്കിയത്. 81 പന്തില്‍ രണ്ട് ബൗണ്ടറിയും മൂന്ന് സിക്‌സറുമടങ്ങുന്നതാണ് മാലിക്കിന്റെ ഇന്നിങ്‌സ്. ഇമാം ഉള്‍ ഹഖ് (രണ്ട്) ഫഖര്‍ സമാന്‍ (17) മുഹമ്മദ് ഹഫീസ് (ഒന്‍പത്) എന്നിവരാണ് പുറത്തായ താരങ്ങള്‍. നേരത്തെ ടോസ് നേടി ബാറ്റിങ് തിരഞ്ഞെടുത്ത ലങ്ക 173 റണ്‍സിന് പുറത്തായി. തിരിമന്നെ (62) മാത്രമാണ് ലങ്കന്‍ നിരയില്‍ തിളങ്ങിയത്. മൂന്ന് വിക്കറ്റെടുത്ത ഹസന്‍ അലി പാക് ബൗളര്‍മാരില്‍ തിളങ്ങി. ഇമാദ് വസീം, ഷദാബ് ഖാന്‍ എന്നിവര്‍ രണ്ട് വിക്കറ്റ് വീഴ്ത്തി.